თეთრი სახლის პრესსპიკერი: „ჰამასის“ განადგურება ღირსეული მიზანია

 კატარის ცალმხრივი დაბომბვა წინ არ წევს ისრაელის ან ამერიკის მიზნებს, თუმცა, „ჰამასის“ განადგურება ღირსეული მიზანია, - ამის შესახებ თეთრი სახლის პრესსპიკერმა ქეროლაინ ლევიტმა ბრიფინგზე განაცხადა.

მისი თქმით, აშშ-ის პრეზიდენტმა დონალდ ტრამპმა კატარელებს ისრაელის მიერ განხორციელებული დარტყმის შესახებ მას შემდეგ აცნობა, რაც ამის შესახებ აშშ-ის სამხედროებისგან შეიტყო. თავდასხმის შემდეგ ტრამპი, ასევე, ესაუბრა ნეთანიაჰუს და კატარის ლიდერებს.

აშშ-ის პრეზიდენტმა დაავალა მის სპეციალურ წარმომადგენელ უიტკოფს კატარელებისთვის მოსალოდნელი თავდასხმის შესახებ ინფორმაციის მიწოდება, რაც მან გააკეთა. პრეზიდენტი კატარს შეერთებული შტატების ძლიერ მოკავშირედ და მეგობრად მიიჩნევს და ძალიან ცუდად გრძნობს თავს ამ თავდასხმის ადგილმდებარეობის გამო. თუმცა, „ჰამასის“ განადგურება, რომელმაც ღაზაში მცხოვრებლების უბედურებისგან სარგებელი მიიღო, ღირსეული მიზანია“, - აღნიშნა თეთრი სახლის პრესმდივანმა.

მისი თქმით, ტრამპს სურს, რომ ყველა მძევალი გათავისუფლდეს და „ეს ომი ახლავე დასრულდეს“.

როგორც თეთრი სახლის პრესსპიკერმა განაცხადა, პრეზიდენტი, ასევე, ესაუბრა კატარის ემირსა და პრემიერ-მინისტრს, მადლობა გადაუხადა მათ ჩვენი ქვეყნისადმი მხარდაჭერისა და მეგობრობისთვის. დონალდ ტრამპმა დაარწმუნა ისინი, რომ მსგავსი რამ მათ ტერიტორიაზე აღარ განმეორდება.