ტრამპი: მხოლოდ მე შემიძლია პუტინის შეჩერება, სამშვიდობო პროცესი კონტროლს ექვემდებარება

აშშ-ის პრეზიდენტმა დონალდ ტრამპმა განაცხადა, რომ რუსეთსა და უკრაინას შორის ომის შემდგომი ესკალაციის შეკავების მცდელობები „კონტროლის ქვეშაა“, - ამის შესახებ მან Outkick-თან ინტერვიუში განაცხადა, წერს Bloomberg.

ტრამპმა ხაზგასმით აღნიშნა, რომ მისი „კარგი“ ურთიერთობები რუსეთის მმართველ ვლადიმერ პუტინთან და უკრაინის პრეზიდენტ ვოლოდიმირ ზელენსკისთან არის საკვანძო მოლაპარაკებებისთვის.

„კარგი იქნებოდა ამის შეჩერება. მე ამას გეტყვით, სხვა ვერავინ შეძლებს მის შეჩერებას, მხოლოდ მე შემიძლია პუტინის შეჩერება“, - განაცხადა ტრამპმა.

18 მარტს სატელეფონო საუბრისას პუტინმა თქვა, რომ მზად იყო შეზღუდოს თავდასხმები უკრაინის ენერგეტიკულ ინფრასტრუქტურაზე, როგორც პირველი ნაბიჯი, მაგრამ არ დათანხმდა ცეცხლის სრულ შეწყვეტას, რასაც შეერთებული შტატები დაჟინებით მოითხოვს. მეორე დღეს, ტრამპთან საუბრისას, ზელენსკი დათანხმდა ენერგეტიკულ ობიექტებზე დარტყმების ორმხრივ შეწყვეტას.

ტრამპმა აღნიშნა, რომ პუტინს „ძალიან კარგად“ იცნობს.

„პუტინი არსად არ შეჭრილა, როცა მე პრეზიდენტი ვიყავი. გახსოვდეთ, რუსეთმა ბუშისგან წაიღო საქართველო, ხომ? მათ წაიღეს ყირიმი, კაცისგან სახელად ობამა, ხომ? მათ სცადეს მთელი ტერიტორია წაეღოთ ბაიდენისგან. ვინ არის ერთადერთი, ვისგანაც რუსეთმა ვერაფერი წაიღო? - ტრამპი. მე არ მგონია, რომ მსოფლიოში ვინმემ შეაჩეროს იგი ჩემს გარდა და ვფიქრობ, იმედი მაქვს, რომ შევძლებ მის შეჩერებას“, - განაცხადა ტრამპმა.