ვენესუელის უზენაესმა სასამართლომ დელსი როდრიგესი ქვეყნის დროებით პრეზიდენტად დანიშნა

 ვენესუელის უზენაესმა სასამართლომ დაადგინა, რომ პრეზიდენტ ნიკოლას მადუროს არყოფნის პერიოდში სახელმწიფოს მეთაურის მოვალეობა ვიცე-პრეზიდენტმა დელსი როდრიგესმა უნდა შეასრულოს.

სასამართლოს განცხადებაში ნათქვამია, რომ როდრიგესი „იკავებს პრეზიდენტის თანამდებობას, რათა გარანტირებული იყოს მართვის უწყვეტობა და ქვეყნის ყოვლისმომცველი დაცვა“.

მანამდე, შაბათს, თავად დელსი როდრიგესი ვენესუელის სახელმწიფო ტელევიზიით ერისადმი მიმართვით გამოვიდა და გამოაცხადა, რომ ნიკოლას მადურო ქვეყნის ერთადერთ კანონიერ პრეზიდენტად რჩება. როდრიგესმა ვენესუელის წინააღმდეგ „აშშ-ის შეიარაღებული აგრესია“ დაგმო და დასძინა, რომ მოქმედი მთავრობა მზად არის ხალხის დასაცავად.

ვიდეო მან თავისი ძმის - ვენესუელის ეროვნული ასამბლეის ხელმძღვანელის, ხორხე როდრიგესის, შინაგან საქმეთა მინისტრის, დიოსდადო კაბელიოსა და თავდაცვის მინისტრის, ვლადიმერ პადრინო ლოპესის გარემოცვაში ჩაწერა.

3 იანვრის ღამეს აშშ-მა ვენესუელაში სამხედრო ოპერაცია ჩაატარა, რის შედეგადაც ამერიკელმა სპეცრაზმელებმა პრეზიდენტი ნიკოლას მადურო და მისი მეუღლე, სილია ფლორესი შეიპყრეს და ქვეყნიდან გაიყვანეს. ისინი ნიუ-იორკში, სასამართლოს წინაშე „ნარკოტერორიზმის“ მიზნით შეთქმულების, კოკაინის შემოტანის, ასევე აშშ-ის წინააღმდეგ გამოსაყენებლად იარაღისა და ასაფეთქებელი მოწყობილობების შენახვის ბრალდებით წარდგებიან. აშშ-ის პრეზიდენტმა დონალდ ტრამპმა განაცხადა, რომ ვენესუელაში ხელისუფლების კანონიერ გადაცემამდე ქვეყანას აშშ უხელმძღვანელებს.