ზელენსკი: უკრაინამ IRIS-T-ის სისტემისთვის ახალი გამშვები დანადგარი მიიღო

უკრაინამ გერმანიისგან IRIS-T საზენიტო-სარაკეტო სისტემისთვის ახალი გამშვები დანადგარი მიიღო. ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.

„ჩვენ მივიღეთ IRIS-T-ის ახალი გამშვები დანადგარი. მადლობას ვუხდით გერმანიას ადამიანების დაცვისადმი მისი მუდმივი ერთგულებისთვის. ასეთი ძლიერი მხარდაჭერის წყალობით ათასობით სიცოცხლე გადარჩა. მაგრამ ჩვენ ასევე გვჭირდება რაკეტები საჰაერო თავდაცვის სისტემებისთვის, რომ გვქონდეს საკმარისი შესაძლებლობები რუსული თავდასხმების მოსაგერიებლად“, - განაცხადა სახელმწიფოს მეთაურმა.

ზელენსკიმ დასძინა, რომ შვედეთთან ასევე არსებობს მნიშვნელოვანი შეთანხმებები, კერძოდ, დახმარების ახალი პაკეტი, მათ შორის უკრაინული ავიაციის გაძლიერება Gripen-ის საბრძოლო თვითმფრინავებით.

„PURL-ის პროგრამა - წელს ახალი შენატანებია... ვიმედოვნებთ როგორც აშშ-ის, ასევე ჩვენი ევროპელი პარტნიორების მხარდაჭერას. რაკეტსაწინააღმდეგო თავდაცვა უკრაინის ერთ-ერთი მთავარი პრიორიტეტია“, - განაცხადა უკრაინის პრეზიდენტმა.

ამასთან დაკავშირებით, მან აღნიშნა, რომ მხოლოდ ამ კვირაში რუსებმა უკრაინის მიმართულებით 2 300-ზე მეტი მოიერიშე დრონი, თითქმის 1 560 მართვადი ავიაბომბი და სხვადასხვა ტიპის 108 რაკეტა გაუშვეს. ამიტომ, მისი თქმით, ძლიერი საჰაერო თავდაცვა უზრუნველყოფს უფრო მეტ დაცვას და რუსეთისთვის უკანასკნელი უპირატესობის ჩამორთმევას.