"დღევანდელი გადაწყვეტილებები წინ გადადგმული ნაბიჯებია, რაც საზოგადოების დაწყნარებასა და ქვეყნის სტაბილურობას უზრუნველყოფს" - სალომე ზურაბიშვილი

მიხეილ სააკაშვილის გორის სამხედრო ჰოსპიტალში გადაყვანის გადაწყვეტილებას, საქართველოს პრეზიდენტი სალომე ზურაბიშვილი გამოეხმაურა.

მან აღნიშნულ გადაწყვეტილებას, წინ გადადგმული ნაბიჯი უწოდა, რაც მისი თქმით, საზოგადოების დაწყნარებას და ქვეყნის სტაბილურობას უზრუნველყოფს.

"მივესალმები ყოფილი პრეზიდენტის გადაყვანის გეგმას გორის სამხედრო ჰოსპიტალში, რადგან ეს არის ადგილი, რომელიც აკმაყოფილებს ყველა სტანდარტს, როგორც სამედიცინო, ასევე უსაფრთხოების მიმართულებით.

ამდენად, ეს გადაწყვეტილება სრულად პასუხობს სტრასბურგის სასამართლოს მოთხოვნას, რომელსაც წინასწარ დაეთანხმა თვით, ყოფილი პრეზიდენტი და განაცხადა, რომ შეწყვეტდა შიმშილობას მულტიპროფილურ კლინიკაში გადაყვანის შემთხვევაში.

მივესალმები ასევე, ელენე ხოშტარიას გადაწყვეტილებას შიმშილობის შეწყვეტასთან დაკავშირებით.

მნიშვნელოვანი და სწორია ოპოზიციის მზაობა არ გამართოს საპროტესტო აქციები კლინიკის მიმდებარე ტერიტორიაზე და ასევე, ზოგი პარტიის გადაწყვეტილება პარლამენტის ბოიკოტის შეწყვეტის შესახებ.

დღევანდელი გადაწყვეტილებები წინ გადადგმული ნაბიჯებია, რაც საზოგადოების დაწყნარებას და ქვეყნის სტაბილურობას უზრუნველყოფს", - აღნიშნავს სალომე ზურაბიშვილი.

ჯანდაცვის მინისტრის ეკატერინე ტიკარაძის განცხადებით, მიიღეს გადაწყვეტილება, რომ საქართველოს მესამე პრეზიდენტი გორის ჰოსპიტალში იქნეს გადაყვანილი.

ამავე თემაზე:

🔲 "მივიღეთ გადაწყვეტილება, რომ საქართველოს მესამე პრეზიდენტი გორის ჰოსპიტალში გადაგვეყვანა" - ჯანდაცვის მინისტრი