"დიასპორის წარმომადგენლებისთვის, პასპორტის საფასური 130 დოლარის ნაცვლად 50 დოლარი გახდა" - იუსტიციის მინისტრის განმარტება პასპორტის ფასის ცვლილებებთან დაკავშირებით

იუსტიციის მინისტრი რატი ბრეგაძე სახელმწიფო სერვისების მომსახურების გაძვირებაზე ამბობს, რომ “ეს საფასურები ბოლოს დაწესდა 2011 წელს და ბუნებრივია, საჭირო გახდა მათი გადახედვა”.

როგორც მან "იმედის" ეთერში აღნიშნა, იუსტიციის სახლი და სახელმწიფო სერვისების განვითარების სააგენტო, მიღებულ შემოსავლებზეა დამოკიდებული.

“შესაძლოა, ეს არ იყოს სასიამოვნო მოსასმენი, თუმცა, აქვე ისიც უნდა ვთქვათ, რომ ეს უწყებები მეტწილად დამოკიდებულები არიან მათ მიერ მიღებულ შემოსავლებზე და ამ თანხის დიდი ნაწილი მიემართება ხელფასების გათანაბრებაზე თბილისში მომუშავე და რეგიონებში მომუშავე თანამშრომლებს შორის, ეს ის ხალხია, რომელიც ჩვენს მოსახლეობას სრული კეთილგანწყობით ემსახურება ყოველდღიურ რეჟიმში” – განაცხადა რატი ბრეგაძემ.

იუსტიციის მინისტრი აღნიშნავს, რომ სახელმწიფო სერვისების, მათ შორის პასპორტის და ID ბარათის საფასურის გაძვირების პარალელურად, გარკვეული მომსახურებები გაიაფდა დიასპორის წარმომადგენლებისთვის. 

"მათთვის პასპორტის საფასური 130 დოლარის ნაცვლად, რომელსაც აქამდე იხდიდნენ და იყვნენ განსხვავებულ მდგომარეობაში, ვიდრე საქართველოს ტერიტორიაზე მცხოვრები საქართველოს მოქალაქეები, გახდა 50 დოლარი" – აღნიშნა ბრეგაძემ.

შეგახსენებთ, რომ პირველი მაისიდან ბიომეტრიული პასპორტის აღება 100 ლარის ნაცვლად, 150 ლარი ღირს, ხოლო პირადობის ელექტრონული მოწმობის – 30 ლარის ნაცვლად, 60 ლარი.

სხვა სიახლეები:

📍"დღეს, 2 მაისს, თბილისის დროით 20:11 საათზე ვენერა თევზების ნიშნიდან ვერძის ზოდიაქოში გადაინაცვლებს - ვისთვის იქნება მნიშვნელოვანი ?!" - რამაზ გიგაურის პროგნოზი

📍გაერო: ომის დაწყებიდან უკრაინა 5,5 მილიონზე მეტმა ადამიანმა დატოვა