დიდი ოდენობით თანხის თაღლითურად დაუფლების ფაქტზე, ერთ პირს ბრალდება წარუდგინეს

თბილისის პროკურატურის თაღლითობის სისხლის სამართლის საქმეებზე საპროცესო ხელმძღვანელობის სამმართველომ, დიდი ოდენობით თანხის თაღლითურად დაუფლების ფაქტზე, ერთ პირს ბრალდება წარუდგინა. ინფორმაციას გენერალური პროკურატურა ავრცელებს.

„შინაგან საქმეთა სამინისტროში ჩატარებული გამოძიებით დადგინდა, რომ ბრალდებული იმ მოტივით, რომ თითქოსდა გარკვეული თანხის სანაცვლოდ, ამერიკის შეერთებული შტატებიდან, საბაზრო ღირებულებაზე დაბალ ფასად კომპიუტერული ტექნიკას შეიძენდა და მათი საქართველოში რეალიზაციის შედეგად მიღებული შემოსავალს გაუნაწილებდა, დაზარალებულის კუთვნილ თანხას თაღლითურად დაეუფლა.

გამოძიებით ასევე დადგინდა, რომ ბრალდებულმა სხვა დაზარალებულს, შემდგომი რეალიზაციის მიზნით მოტყუებით გამოართვა 19 ცალი მობილური ტელეფონი და მაჯის საათი, თუმცა თანხა არ გადაუხადა.

აღნიშნული ქმედებებით ბრალდებული დაზარალებულების კუთვნილ, დიდი ოდენობით 467 000 ლარს დაეუფლა.

დაკავებულს ბრალდება საქართველოს სისხლის სამართლის კოდექსის 180-ე მუხლის მე-3 ნაწილის „ბ“ ქვეპუნქტით (თაღლითობა, ჩადენილი დიდი ოდენობით, 2 ეპიზოდი) წარედგინა, რაც სასჯელის სახედ და ზომად 9 წლამდე თავისუფლების აღკვეთას ითვალისწინებს.

პროკურატურის შუამდგომლობის საფუძველზე სასამართლომ ბრალდებულს აღკვეთის ღონისძიების სახით პატიმრობა უკვე შეუფარდა“, - აღნიშნულია პროკურატურის ინფორმაციაში.