გია ვოლსკი: სტამბოლში, ნატოს სამიტზე ალიანსის წევრი ქვეყნები არიან მიწვეული, პარტნიორი ქვეყნები კი, მიუნხენის უსაფრთხოების კონფერენციაში მიიღებენ მონაწილეობას, სადაც მაკა ბოჭორიშვილი სიტყვით გამოვა

„ნატოს სამიტზე მხოლოდ ალიანსის წევრი ქვეყნები არიან მიწვეული, ხოლო პარტნიორი ქვეყნები მიუნხენის უსაფრთხოების კონფერენციაში მიიღებენ მონაწილეობას“, - ამის შესახებ საქართველოს პარლამენტის ვიცე-სპიკერმა გია ვოლსკიმ განაცხადა.

„როგორც კი ცნობილი გახდა, რომ სტამბოლში ნატოს სამიტი გაიმართება, მასშტაბური პროპაგანდისტული კამპანია ამუშავდა. ამბობენ, რომ საქართველო სამიტზე არ დაპატიჟეს, მაგრამ ამ სამიტზე ნატოს არც ერთი არაწევრი ქვეყანა არ არის მიწვეული.

ადრე არსებობდა ფორმატი, რომლის ფარგლებშიც, ნატოს სამიტის პარალელურად, პარტნიორ ქვეყნებთან Side Event შეხვედრა იმართებოდა. ახლა ასეთი ფორუმი არ ტარდება. სამაგიეროდ, ამავე პერიოდში, სტამბოლში მიუნხენის უსაფრთხოების კონფერენციის ფორმატში შეხვედრა გაიმართება, სადაც საქართველოს საგარეო საქმეთა მინისტრი უკვე გაემგზავრა და ხვალ სიტყვით გამოვა.

რაც შეეხება ნატოს სამიტს, მასზე მხოლოდ ალიანსის წევრი ქვეყნები არიან მიწვეული, ხოლო პარტნიორი ქვეყნები მიუნხენის უსაფრთხოების კონფერენციაში მიიღებენ მონაწილეობას. იმის მტკიცება, თითქოს საქართველო გვერდზე გასწიეს, ყურადღება არ მიაქციეს ან ქვეყნის მიმართ რაიმე განგებ „სასჯელია“ გამოწერილი, პროპაგანდაა. ეს ის პროპაგანდაა, რითაც უნდათ, ხალხი ქუჩაში გამოიყვანონ, თითქოს საქართველო ამ მნიშვნელოვან ფორუმს მოწყვეტილია, რაც არა მხოლოდ სიმართლეს არ შეესაბამება, არამედ ბოროტი განზრახვით გავრცელებული ინფორმაციაა“, - განაცხადა ვოლსკიმ.