ირაკლი ქადაგიშვილი: საფრანგეთის მიერ გარე ჩარევებთან დაკავშირებით კანონის გამკაცრება ნათელი მაგალითია, როგორ ხდება საქართველოზე ზეწოლა, მათაც დაინახეს, რომ არსებობს კონკრეტული საფრთხეები

პარლამენტის თვითმმართველობის კომიტეტის თავმჯდომარის ირაკლი ქადაგიშვილის განცხადებით, საფრანგეთის მიერ გარე ჩარევებთან დაკავშირებით კანონის გამკაცრება კიდევ ერთი ნათელი მაგალითია, როგორ ხდება საქართველოზე ზეწოლა.

„ეს ხდება არა დემოკრატიული პრინციპებიდან ან ქვეყნის ინტერესებიდან, არამედ სხვების ინტერესებიდან გამომდინარე. საქართველომ გარე დაფინანსებებთან, გარე ჩარევებთან, იგივე მიტინგების მართვასთან დაკავშირებით გაცილებით ჰუმანური კანონმდებლობა მიიღო, ვიდრე - სხვა ქვეყნებმა. მათ გაცილებით მძიმე და ბრუტალური კანონმდებლობა მიიღეს.

მათაც დაინახეს, რომ არსებობს კონკრეტული საფრთხეები, არა მარტო სახელმწიფოს სუვერენიტეტის, არამედ დემოკრატიისა და საზოგადოების წინააღმდეგ მიმართული. საფრანგეთის შინაგან საქმეთა მინისტრმა კანონის მიღების დროს საქართველოს მაგალითი მოიყვანა.

ჩვენ ვმოქმედებთ იმ სტანდარტით, რა სტანდარტითაც დემოკრატია მოქმედებს სუვერენულ სახელმწიფოში. რატომ არიან რეპუტაციაშელახული დასავლური ინსტიტუტები და რატომ არიან დასავლეთის ბევრი ქვეყნის ეროვნული მთავრობები ავტორიტეტდაკარგული საკუთარ საზოგადოებაში? იმიტომ, რომ წვრილ პოლიტიკურ ინტერესებზე პრინციპები გაიწირა. სწორედ ეს წვრილი პოლიტიკური ინტერესები იყო, რომელიც საქართველოში მათ ამოძრავებდათ და არა - დემოკრატია.

ვერც მედიის თავისუფლებას ხედავდნენ, ვერც ბიზნესის თავისუფლებას, ვერც ყველა იმ რეფორმას, რომელიც არჩევნებთან დაკავშირებით ჩატარდა, რამაც საშუალება მისცა ოპოზიციას, საქართველოში ისტორიაში პირველად, რომ ყველაზე წარმატებული შედეგი მიიღო. ამიტომ, ამ შემთხვევაში მათი ინტერესი აცდენილი იყო იმ ლოზუნგებს, რა ლოზუნგებითაც ხალხს ერთგვარად თვალს უბრმავებდნენ. ამ ლოზუნგების უკან ჰქონდათ ხელისუფლებაში მოსვლის კონკრეტული მიზნები - დანიშნული მარიონეტების მოყვანის. ეს არ გამოუვიდათ“, - აღნიშნა ირაკლი ქადაგიშვილმა.