ირაკლი ქადაგიშვილი საკადრო ცვლილებებზე: გასაგებია, რომ ოპოზიცია ამით სპეკულირებს, სხვა რა დარჩენიათ

 მე ცოტა ფართო კონტექსტში შევხედავდი საკადრო ცვლილებებს, რომელიც საქართველოს მთავრობასა და ხელისუფლების სხვადასხვა უწყებებში მიმდინარეობს იმიტომ, რომ ირაკლი კობახიძე რაც გახდა პრემიერ-მინისტრი, მან მინისტრთა კაბინეტში ძალიან ბევრი სიახლე შემოიტანა, - განაცხადა გადაცემა „დღის ქრონიკაში“ რეგიონული პოლიტიკისა და თვითმმართველობის კომიტეტის თავმჯდომარემ, საპარლამენტო უმრავლესობის წევრმა ირაკლი ქადაგიშვილმა.

მისივე თქმით, მათ შორის ე.წ. სამართალდამცავ და ძალოვან უწყებებშიც მოხდა გარკვეული ცვლილებები.

„სახელმწიფო უსაფრთხოების სამსახურს ახალი ხელმძღვანელი ჰყავს, შინაგან საქმეთა სამინისტროს ახალი ხელმძღვანელი ჰყავს და ეს, ბუნებრივია, იწვევს ობიექტურად საკადრო ცვლილებებსაც. ანუ, ცვლილება მინისტრისა ნიშნავს, რომ მინისტრს მიდგომები, სამუშაო პროცესი, საკადრო ხედვა, ყველაფერ ამასთან დაკავშირებით თავისი ხედვები გააჩნია. ბუნებრივია, რომ ამ ხედვების რეალიზაციისთვის მას სჭირდება კონკრეტული ადამიანების და თანამშრომლების სხვადასხვა პოზიციაზე გადაადგილება ან ახალი თანამშრომლის მოყვანა, რომ მისი, ასე ვთქვათ, ხედვა და პოლიტიკა, რაც მან სამინისტროში და სამინისტროს მეშვეობით უნდა გაატაროს, იყოს რეალიზებული. ამიტომ, ჩვენ ამ ცვლილებებს ვხედავთ და ეს ცვლილებები არის პოლიტიკურ კურსთან სრულ თანხვედრაში და შეთანხმებულია. ამიტომ, ამაში რაიმე განსაკუთრებული არ შეიძლება დავინახოთ ნეგატივის კუთხით. პირიქით, კარგია როდესაც ახალ მინისტრს აქვს ის ხედვა და უნარი, რომ სისტემაში გარკვეული ცვლილებები მოახდინოს. მათ შორის, საკადრო ცვლილებები. არცერთი ღირსეული თანამშრომელი, მათ შორის შინაგან საქმეთა სამინისტროში, სისტემის გარეშე არ რჩება და სხვა საპასუხისმგებლო თანამდებობებზე აგრძელებენ მუშაობას“, - აღნიშნა ირაკლი ქადაგიშვილმა.

მისივე თქმით, გასაგებია, რომ ოპოზიცია ამით სპეკულირებს, მაგრამ სხვა რა დარჩენიათ.

„ეს მათი სპეკულაციის საგანია და მეტი სხვა არაფერი. რეალობა, ამ შემთხვევაში ის არის, რაზეც მე ვსაუბრობდი“, - აღნიშნა ირაკლი ქადაგიშვილმა.