ლევან მაჭავარიანი: ბუმერანგის პრინციპით უბრუნდებათ ევრობიუროკრატებს ის უსამართლობა, რასაც ისინი 4 წლის განმავლობაში ჩვენს ქვეყანასთან მიმართებაში სჩადიან - აშშ-ს ევროკავშირთან დემოკრატიასთან დაკავშირებით ძალიან ბევრი პრეტენზია აქვს

ბუმერანგის პრინციპით უბრუნდებათ ევრობიუროკრატებს ის უსამართლობა, რასაც ისინი 4 წლის განმავლობაში ჩვენს ქვეყანასთან მიმართებაში სჩადიან, - განაცხადა ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.

იგი ამგვარად აფასებს აშშ-ის გადაწყვეტილებას, ყოფილ ევროკომისარს, ტიერი ბრეტონს და დეზინფორმაციის გავრცელების წინააღმდეგ მებრძოლი არასამთავრობო ორგანიზაციების ოთხ წარმომადგენელს ამერიკის შეერთებულ შტატებში ჩასვლა აუკრძალოს.

„თუმცა, როცა მათი [ევრობიუროკრატების] მხრიდან კონკრეტული უსამართლობაა, მათ შორს სანქციების თემაზე, ამას არასდროს არ მოჰყვება დასაბუთება და არგუმენტები. ხოლო ამერიკის შეერთებულმა შტატებმა დაუსაბუთა, თუ რატომ დაასანქცირეს ეს 5 მოქალაქე, რომელზეც ასე შესტკივა გული ევრობიუროკრატიას. მათგან ერთ-ერთი მაღალჩინოსანი - ევროკომისარი იყო, ისინი მედიაპლატფორმებზე ცენზურას ეწეოდნენ.

ამერიკის შეერთებულ შტატებს ევროკავშირთან ძალიან ბევრი პრეტენზია აქვს დემოკრატიასთან და იმასთან დაკავშირებით, რომ ევროკავშირი ამ ბიუროკრატიის პირობებში ევროპულ ღირებულებებს სცილდება. ერთ-ერთი ასეთი ევროპული ღირებულება არის სიტყვის თავისუფლება და ამერიკის შეერთებული შტატები ფაქტებით უდასტურებს და უმტკიცებს ევრობიუროკრატებს, რომ ისინი ევროკავშირში საწინააღმდეგო აზრს შეგნებულად ახშობენ”, - განაცხადა ლევან მაჭავარიანმა.

პრეზიდენტ ტრამპის ადმინისტრაციამ ყოფილ ევროკომისარს, ტიერი ბრეტონს და დეზინფორმაციის გავრცელების წინააღმდეგ მებრძოლი არასამთავრობო ორგანიზაციების ოთხ წარმომადგენელს ამერიკის შეერთებულ შტატებში ჩასვლა აუკრძალა.

გადაწყვეტილება ხუთი პირისთვის დაწესებული აკრძალვის შესახებ 23 დეკემბერს გამოაცხადა სახელმწიფო მდივანმა მარკო რუბიომ. აშშ სანქცირებულებს ადანაშაულებს ამერიკული პლატფორმების იძულებითი ცენზურის, დემონეტიზაციისა და მათთვის მიუღებელი ამერიკული მოსაზრებების ჩახშობისკენ მიმართული ძალისხმევის ორგანიზებაში.