ლევან მაჭავარიანი გაბარდის განცხადებაზე: ეს ძალიან ნაცნობი ხელწერაა, ჩვენ ასეთი ბევრი მაგალითი ვიცით საქართველოს შემთხვევაში

 „ეს ძალიან ნაცნობი ხელწერაა, ჩვენ ასეთი ბევრი მაგალითი ვიცით საქართველოს შემთხვევაში“, - ასე გამოეხმაურა ფრაქცია „ქართული ოცნების“ თავმჯდომარის მოადგილე ლევან მაჭავარიანი აშშ-ის ეროვნული დაზვერვის დირექტორის ტულსი გაბარდის განცხადებას.

მისი თქმით, ბიძინა ივანიშვილს ადანაშაულებენ რაღაც რუსულ კავშირებში მაშინ, როდესაც 25 წელზე მეტია ფიზიკურად რუსეთში არ არის ნამყოფი.

„ჩვენ უნდა დაველოდოთ როგორ დასრულდება ეს გამოძიება, ვინაიდან ეს მტკიცებულებები არის გადაცემული იუსტიციის დეპარტამენტისთვის, თუმცა ხელწერა  ერთი და იგივე არის. როდესაც ბატონ ტრამპს ამ ყველაფერს აბრალებდნენ - ყოველგვარი საფუძვლის გარეშე, ყოველგვარი მტკიცებულების გარეშე და იქ გაყალბებაზეც არის საუბარი, რომ რაღაც დოკუმენტაცია CAI-მ და FBI-მ გააყალბეს ამ ყველაფერთან დაკავშირებით.

ეს ძალიან ნაცნობი ხელწერაა, რა თქმა უნდა, ვინაიდან ჩვენ ასეთი ბევრი მაგალითი ვიცით საქართველოს შემთხვევაში, როდესაც ბატონ ბიძინა ივანიშვილს ადანაშაულებენ რაღაც რუსულ კავშირებში მაშინ, როდესაც 25 წელზე მეტია იგი ფიზიკურად რუსეთში არ არის ნამყოფი და მისი მთელი აქტივები დასავლეთშია წარმოდგენილი. იმავეს ვაკვირდებით ჩვენ ბატონი ორბანის წინააღმდეგ, როდესაც არის ხოლმე კამპანია“, - აღნიშნავს მაჭავარიანი.