მაკა ბოჭორიშვილი დუბროვნიკის ფორუმის მნიშვნელობაზე: კარგი შესაძლებლობაა საქართველოსთვის მნიშვნელოვანი და აქტუალური საკითხების გასაჟღერებლად

საქართველოს ვიცე-პრემიერის, საგარეო საქმეთა მინისტრის მაკა ბოჭორიშვილის განცხადებით, დუბროვნიკის ფორუმი ბოლო წლებში მნიშვნელოვან საერთაშორისო პლატფორმად ჩამოყალიბდა, რომელიც აერთიანებს მაღალი დონის წარმომადგენლებს საერთაშორისო ორგანიზაციებიდან და სხვადასხვა ქვეყნებიდან.

„დუბროვნიკის ფორუმი ბოლო წლებში მნიშვნელოვან პლატფორმად ჩამოყალიბდა. ევროპაში ეს არის ერთ-ერთი კონფერენცია, რომლის ფარგლებშიც იკრიბებიან მაღალი დონის წარმომადგენლები საერთაშორისო ორგანიზაციებიდან, სხვადასხვა სახელმწიფოებიდან და განიხილავენ საერთაშორისო ურთიერთობების, საგარეო პოლიტიკის მნიშვნელოვან ასპექტებს. ჩვენთვის, რა თქმა უნდა, მნიშვნელოვანია ამ ფორუმში მონაწილეობა. კარგი შესაძლებლობაა საქართველოსთვის მნიშვნელოვანი და აქტუალური საკითხების გასაჟღერებლად“,  - ამის შესახებ მაკა ბოჭორიშვილმა ჟურნალისტებთან საუბრისას განაცხადა.

მინისტრის თქმით, წელს ფორუმის მთავარი თემებია რეგიონული თანამშრომლობა და მულტივექტორული დიპლომატია, რაც საქართველოსთვის განსაკუთრებულად მნიშვნელოვანია.

„წელს ამ ფორუმის განხილვის მთავარი თემაა რეგიონული თანამშრომლობები, მულტივექტორული დიპლომატია, რაც ასევე ძალიან მნიშვნელოვანია ჩვენთვის და გვექნება საუბარი სწორედ ამ კონტექსტში საქართველოს როლზე რეგიონში, ფართო რეგიონში დაკავშირებადობის კონტექსტში, ზოგადად, საერთაშორისო პარტნიორობების და თანამშრომლობების განვითარების კონტექსტში. ასევე კარგი შესაძლებლობაა, გვქონდეს განხილვები კოლეგებთან სხვადასხვა საერთაშორისო ორგანიზაციებიდან,“ - აღნიშნა უწყების ხელმძღვანელმა.

მაკა ბოჭორიშვილმა, ასევე ისაუბრა ეუთოსთან თანამშრომლობის მნიშვნელობაზე და აღნიშნა, რომ საქართველო აგრძელებს აქტიურ კონსულტაციებს ორგანიზაციის წევრ სახელმწიფოებთან, ქვეყნის მიერ წარდგენილი თავმჯდომარეობის კანდიდატურის მხარდაჭერის უზრუნველსაყოფად.

„შევხვდი ეუთოს გენერალურ მდივანს. იცით, რომ საქართველოს აქვს წარდგენილი საკუთარი კანდიდატურა მომავალ წელს ეუთოს თავმჯდომარის პოსტზე. ამ თვალსაზრისით მნიშვნელოვანია, ეუთოს ყველა წევრ სახელმწიფოსთან კონსულტაციები და მუშაობა, იმისათვის, რომ საქართველოს ჰქონდეს საჭირო მხარდაჭერა. ასევე ვაგრძელებთ კონსულტაციებს და მუშაობას ეუთოს სხვა წევრ სახელმწიფოებთან, აქ იმყოფებიან სხვადასხვა სახელმწიფოების საგარეო საქმეთა მინისტრები და ამ კონტექსტშიც მნიშვნელოვანია, ეს პლატფორმა, რომ გამოვიყენოთ ჩვენთვის მნიშვნელოვან საკითხებზე სამსჯელოდ და სასაუბროდ,“ - განაცხადა საგარეო საქმეთა მინისტრმა.