მაკა ბოჭორიშვილი: საქართველოსა და აზერბაიჯანს შორის საუკეთესო ორმხრივი თანამშრომლობის შედეგია განხორციელებული რეგიონული პროექტები, რომელთა მნიშვნელობა იზრდება შუა დერეფნის კონტექსტში

„საქართველოსა და აზერბაიჯანს შორის სწორედ საუკეთესო ორმხრივი თანამშრომლობის შედეგია უმნიშვნელოვანესი რეგიონული პროექტები, რომლის განხორციელებაც ჩვენ ბოლო ათწლეულების მანძილზე შევძელით და დღეს მათი მნიშვნელობა კიდევ უფრო იზრდება, სწორედ შუა დერეფნის კონტექსტში“, - ამის შესახებ საქართველოს საგარეო საქმეთა მინისტრმა მაკა ბოჭორიშვილმა აზერბაიჯანის საგარეო საქმეთა მინისტრთან ჯეიჰუნ ბაირამოვთან ერთად გამართულ ბრიფინგზე განაცხადა.

მაკა ბოჭორიშვილის თქმით, ბაქო-თბილისი-ჯეიჰანის ნავთობსადენი, ბაქო-თბილისი-ერზურუმის გაზსადენი, ბაქო-თბილისი-ყარსის რკინიგზა არის იმ პროექტების არასრული ჩამონათვალი, რომლებიც ხორციელდება და რომლებსაც კიდევ უფრო დიდი მნიშვნელობა აქვს დღეს, ვიდრე მაშინ, როდესაც დაიწყო ამ პროექტების განხორციელება.

„ის საუკეთესო მაგალითები, რომლებიც სწორედ ამ პროექტების განხორციელებით შევქმენით, კარგი საფუძველია, რათა უფრო მეტი დავაშენოთ, უფრო მეტი რეგიონული პროექტი განვახორციელოთ. ამ კონტექსტში ალბათ უნდა აღინიშნოს სამმხრივი თანამშრომლობა, რომელიც საქართველოს-აზერბაიჯანსა და თურქეთს შორის არის, ეს არის ძალიან მნიშვნელოვანი ფორმატი და ამ კონტექსტშიც საქართველო დიდ ყურადღებას აქცევს სამმხრივ ფორმატში თანამშრომლობის გაძლიერებას“, - აღნიშნა ბოჭორიშვილმა.