მარიამ ლაშხი პროექტის - „მე, ოჯახი, სახელმწიფო“ პრეზენტაციას დაესწრო

პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე მარიამ ლაშხი პროექტის - „მე, ოჯახი, სახელმწიფო“ პრეზენტაციას დაესწრო.

მარიამ ლაშხმა ღონისძიების მონაწილეებს სიტყვით მიმართა. მან თავის გამოსვლაში პროექტის მნიშვნელობაზე ისაუბრა და განსაკუთრებული ყურადღება დემოგრაფიულ საკითხებზე და ეროვნული იდენტობის შენარჩუნებაზე გაამახვილა.

„დემოგრაფია არის ეროვნული უსაფრთხოების ერთ-ერთი უმნიშვნელოვანესი საკითხი. იგი პირდაპირ უკავშირდება ქვეყნის უსაფრთხოებასა და მომავალს. სასიცოცხლოდ მნიშვნელოვანია, გავაძლიეროთ ძალისხმევა დემოგრაფიული მდგომარეობის გასაუმჯობესებლად და ეროვნული იდენტობის შესანარჩუნებლად. ასევე მნიშვნელოვანია გვახსოვდეს ჩვენი ისტორია, რადგან წარსულის ცოდნა გვაძლევს შესაძლებლობას სწორად დავგეგმოთ ქვეყნის მომავალი განვითარება“, - განაცხადა მარიამ ლაშხმა.

პროექტის შესახებ ისაუბრა და პრეზენტაცია წარადგინა დემოგრაფიული აღორძინების ფონდის გამგეობის თავმჯდომარემ თამარ ჩიბურდანიძემ.

ღონისძიების მონაწილეებს სიტყვით მიმართეს: პარლამენტის წევრმა ზურაბ ქადაგიძემ, ახალგაზრდობის სააგენტოს ხელმძღვანელის მოადგილემ ანზორ მეგრელიშვილმა, ეროვნული ბიბლიოთეკის დირექტორმა კონსტანტინე გამსახურდიამ, ზურაბ ჟვანიას სახელობის სახელმწიფო ადმინისტრირების სკოლის დირექტორმა დავით გიორგაძემ და სხვა მოწვეულმა სტუმრებმა.

პროექტი ახალგაზრდებისთვისაა განკუთვნილი და მისი მთავარი პრინციპია ტრადიციების და თანამედროვეობის სინთეზი.

პროექტი 4-თვიანია, იგი კონკურსის სახით ტარდება და მოიცავს შემდეგ თემატურ მიმართულებებს: ოჯახი, თაობათაშორისი ურთიერთობები, მიგრაცია და ჯანმრთელი ცხოვრების წესის პოპულარიზაცია. კონკურსში გამარჯვებული ახალგაზრდები სხვადასხვა პრიზებით დაჯილდოვდებიან.

პროექტს „მე, ოჯახი, სახელმწიფო“ საქართველოს დემოგრაფიული აღორძინების ფონდი ს(ს)იპ ახალგაზრდობის სააგენტოს საგრანტო კონკურსის „ახალგაზრდული ორგანიზაციების გაძლიერების“ ფარგლებში ახორციელებს.

პროექტის თანადამფინანსებელია თბილისის მერია.