მარიამ ქვრივიშვილმა ავიაკომპანიების წარმომადგენლებთან ზაფხულის სანავიგაციო სეზონზე ავიაბაზრის არსებული ტენდენციები განიხილა

ეკონომიკისა და მდგრადი განვითარების მინისტრი მარიამ ქვრივიშვილი, მინისტრის მოადგილე თამარ იოსელიანთან ერთად, სხვადასხვა ავიაკომპანიების წარმომადგენლებს შეხვდა. ინფორმაციას ეკონომიკის სამინისტრო ავრცელებს.

სამუშაო შეხვედრის მთავარ მიზანს ქვეყნის აეროპორტებში ზაფხულის სანავიგაციო სეზონის შეუფერხებელი ოპერირება და სამომავლო გეგმების კოორდინაცია წარმოადგენდა. აღინიშნა, რომ სახელმწიფო რჩება ავიაკომპანიების მუდმივ პარტნიორად და მზად არის, მაქსიმალურად შეუწყოს ხელი სექტორში სტაბილურობის შენარჩუნებასა და დაკავშირებადობის შემდგომ ზრდას.

შეხვედრაზე ხაზგასმით აღინიშნა, რომ სახელმწიფო და კერძო სექტორი კოორდინირებულად იმუშავებენ, რათა ინდუსტრია მომზადებული დახვდეს ნებისმიერ არსებულ თუ პოტენციურ გამოწვევას.მხარეებმა იმსჯელეს იმ გლობალურ გამოწვევებზე, რომლებიც პირდაპირ აისახება საავიაციო ბაზრის სტაბილურობაზე, აგრეთვე მათი ერთობლივად დაძლევის გზებზე.

შეხვედრაზე საუბარი შეეხო მიმდინარე საავიაციო სტატისტიკას. როგორც მინისტრმა აღინიშნა, 2025 წელი საქართველოს ავიაციის სექტორისთვის რეკორდული იყო - პიკურ პერიოდში საქართველოს აეროპორტებში 70-ზე მეტი ავიაკომპანია 120-ზე მეტ საჰაერო ხაზზე ოპერირებდა კვირაში დაახლოებით 760 სიხშირით.

ხაზი გაესვა, რომ რეგიონში არსებული ვითარების მიუხედავად, სამოქალაქო ავიაციის სექტორში ზრდის ტენდენცია 2026 წლის პირველ კვარტალშიც გაგრძელდა და როგორც მგზავრთნაკადი, ისე შესრულებული ავიარეისების რაოდენობა წინა წლის ანალოგიურ პერიოდთან შედარებით გაიზარდა.

აღინიშნა, რომ ეკონომიკის სამინისტრო, საავიაციო უწყებებთან ერთად, აქტიურ მოლაპარაკებებს აწარმოებს სხვადასხვა ქვეყნების საავიაციო ხელისუფლებებთან და ავიაკომპანიებთან საქართველოს მიმართულებით ახალი პირდაპირი რეისების დანიშვნის თაობაზე - შედეგად, საქართველოს ავიაბაზარი ეტაპობრივად ზრდის ძველ დინამიკას უბრუნდება.

შეხვედრას ესწრებოდნენ სამოქალაქო ავიაციის სააგენტოს დირექტორი გივი დავითაშვილი და საქართველოს აეროპორტების გაერთიანების გენერალური დირექტორი ლევან მოსეშვილი.