მიხეილ ყაველაშვილი „ჯარის ბანაკის“ გახსნაზე: მამული, ენა სარწმუნოება, ჩვენი წინაპრები ამას ეწირებოდნენ - წარმოუდგენელია და შეუძლებელია თავისუფლება ამ ტრიადის გარეშე

 „მამული, ენა სარწმუნოება, ჩვენი წინაპრები ამას ეწირებოდნენ - წარმოუდგენელია და შეუძლებელია თავისუფლება ამ ტრიადის გარეშე“,- ამის შესახებ საქართველოს პრეზიდენტმა მიხეილ ყაველაშვილმა „ჯარის ბანაკის“ გახსნის ღონისძიებაზე სიტყვით გამოსვლისას განაცხადა.

ქვეყნის მთავარსარდალმა ღონისძიებაზე ახალგაზრდებს მიმართა, რომ პროექტის ფარგლებში მათ მიეცემათ ეროვნული სამხედრო ფორმის ჩაცმის შესაძლებლობა.

მისივე თქმით, ამაზე დიდი სიამაყე ქართველისთვის არ არსებობს.

„თქვენ ახლა უნდა აირჩიოთ პროფესიები და უნდა იყოთ წარმატებულები, დარწმუნებული ვარ იქნებით კიდეც. ის რომ დღეს ჩვენ დამოუკიდებლები ვართ, ის რომ დღეს ეს ტრიადა გვაქვს - მამული, ენა, სარწმუნოება, ჩვენი წინაპრების დამსახურებაა, ისინი სწორედ მის დაცვას ეწირებოდნენ.

წარმოუდგენელია და შეუძლებელია თავისუფლება ამ ტრიადის გარეშე, სამშობლოს გარეშე და მინდა დაიმახსოვროთ, რომ თქვენი პროფესიის არჩევის დროს, როცა იქნებით წარმატებული პროფესიონალები თქვენს დარგში, აუცილებლად სამშობლოსთან ერთად უნდა იყოს ეს ყველაფერი, სამშობლო თან უნდა გდევდეთ სულ, მუდმივად, ნებისმიერ თქვენს პროფესიაში და წარმატებაში. სხვანაირად შეუძლებელია. არ არსებობს თავისუფლება, მით უმეტეს ქართველისთვის, სამშობლოს გარეშე.

ამ ნაწილში, სწორედ „ჯარის ბანაკი“ არის ძალიან მნიშვნელოვანი. ჩვენი ჯარის, თავდაცვის ნაწილის წარმომადგენლები სწორედ ამას გაზიარებენ, როგორი სულისკვეთებაა, როგორი პატრიოტიზმია და რას ნიშნავს იყო ქართველი ჯარისკაც. დღეს ხომ ვხედავთ, მე თავადაც ყოფილი სპორტსმენი ვარ, ჩვენი სპორტსმენები როგორ გვასახელებენ და რამხელა მნიშვნელობა აქვს თითოეული ჩვენგანის წარმატებას საქართველოსთვის, როგორი ამაყები ვართ, როდესაც სპორტსმენების ეროვნული ფორმით ვართ შემოსილნი. უფრო დიდი მნიშვნელობა აქვს ჩაიცვათ სამხედრო ფორმა, ამაზე დიდი სიამაყე არ არსებობს, სწორედ ამას გაზიარებენ ჩვენი ძვირფასი თავდაცვის ძალების წარმომადგენლები“, - განაცხადა მიხეილ ყაველაშვილმა.