"მიუხედავად იმ განცხადებებისა, რომელიც უკრაინის ხელისუფლების მხრიდან კეთდება, საქართველოს მხარდაჭერა უკრაინის მიმართ ურყევად გაგრძელდება" - ირაკლი კობახიძე

„ქართული ოცნების“ თავმჯდომარე ირაკლი კობახიძე აცხადებს, რომ უკრაინის მხრიდან პარლამენტის თავმჯდომარის, შალვა პაპუაშვილის მიმართ მოწვევის გამოგზავნა არარელევანტურია.

მისივე განცხადებით, მიუხედავად იმ განცხადებებისა, რომელიც უკრაინის ხელისუფლების მხრიდან კეთდება, საქართველოს მხარდაჭერა უკრაინის მიმართ ურყევად გაგრძელდება.

"პარლამენტის თავმჯდომარემ გამოხატა თავისი პოზიცია ამ საკითხთან დაკავშირებით.

არის სამწუხარო რეალობა, როდესაც სამწუხაროდ, ჩვენ ვისმენთ სახელმწიფოს მიმართ შეურაცხმყოფელ განცხადებებს უკრაინის ხელისუფლების მხრიდან, რასაც აქვს თავისი ლოგიკური მიზეზი, დეტალებში აღარ შევალ.

ამ ფონზე ასეთი მოწვევის გამოგზავნა სამწუხაროდ, არარელევანტურია.

ძალიან დიდი იმედი გვაქვს, უკრაინის ხელისუფლება გათავისუფლდება იმ ადამიანებისგან, რომლებიც პრაქტიკულად უზრუნველყოფენ იმას, რომ უკრაინის ხელისუფლების მხრიდან ჩვენი სახელმწიფოს მიმართ იდგმება არასწორი ნაბიჯები.

ჩვენ არაერთი ნაბიჯი გადავგდით, არა მარტო ომის დაწყების დღიდან, ომამდეც ჩვენი მხარდაჭერა უკრაინის სახელმწიფოს, ხალხის მიმართ იყო ურყევი და ძალიან მტკიცე მთელი ამ პერიოდის განმავლობაში.

ამის მიუხედავად, სამწუხაროდ, იქიდან გადმოდგმული ნაბიჯები არ იყო შესაბამისი.

ეს არის ჩვენთვის ძალიან სამწუხარო და სინანული გვინდა ამასთან დაკავშირებით გამოვხატოთ.

რაც შეეხება ჩვენს დამოკიდებულებას, ჩვენი დამოკიდებულება არის შემდეგი – ჩვენთვის დასანანია ის გადაწყვეტილებები და განცხადებები, რომლებიც კეთდება უკრაინის ხელისუფლების მხრიდან.

ამ ყველაფრის მიუხედავად, უკრაინელი ხალხისა და უკრაინის სახელმწიფოს მიმართ ჩვენი მხარდაჭერა ურყევად გაგრძელდება.

ეს არის ჩვენი ძალიან მყარი პოზიცია", – აღნიშნა კობახიძემ.

საქართველოში უკრაინის ელჩის მოვალეობის შემსრულებელმა ანდრეი კასიანოვმა გუშინ განაცხადა, რომ ბუჩას ტრაგედიის სანახავად უკრაინის რადას თავმჯდომარემ რუსლან სტეფანჩუკმა პარლამენტარები მიიწვია. 

ამავე თემაზე:

🔵 "ჯანმრთელობის მდგომარეობის გამო შალვა პაპუაშვილი გადასულია მუშაობის დისტანციურ რეჟიმზე"

🔵 "საკითხების განუმარტებლობის ფონზე, ოფიციალური მოწვევა არასათანადოდ ჩანს" - შალვა პაპუაშვილი ქალაქ ბუჩაში უკრაინელი კოლეგის მოწვევაზე