პროკურატურაში თაღლითობის სისხლის სამართლის საქმეებზე საპროცესო ხელმძღვანელობისა და არასრულწლოვანების საქმეთა სამმართველოები შეიქმნა

თბილისის პროკურატურაში თაღლითობის სისხლის სამართლის საქმეებზე საპროცესო ხელმძღვანელობის სამმართველო და არასრულწლოვანების საქმეთა სამმართველო შეიქმნა, - ინფორმაციას საქართველოს პროკურატურა ავრცელებს.

„თაღლითობის სისხლის სამართლის საქმეებზე საპროცესო ხელმძღვანელობის სამმართველო შინაგან საქმეთა სამინისტროს თბილისის პოლიციის დეპარტამენტის საგამოძიებო მთავარი სამმართველოს თაღლითობის წინააღმდეგ ბრძოლის სამმართველოში გამოძიებაზე საპროცესო ხელმძღვანელობას და შესაბამის სისხლის სამართლის საქმეებზე სასამართლოში სახელმწიფო ბრალდების მხარდაჭერას განახორციელებს.

თაღლითობის სისხლის სამართლის საქმეებზე საპროცესო ხელმძღვანელობის სამმართველოს ეფექტურად ფუნქციონირების მიზნით, საქმიანობას განახორციელებენ ის პროკურორები, რომლებსაც შესაბამისი გამოცდილება გააჩნიათ აღნიშნულ დანაშაულებზე გამოძიებაში ზედამხედველობისა და სასამართლოში სახელმწიფო ბრალდების მხარდაჭერის მიმართულებით.

თავის მხრივ, ასევე, ახლად შექმნილი არასრულწლოვანების საქმეთა სამმართველო, შინაგან საქმეთა სამინისტროს თბილისის პოლიციის დეპარტამენტის არასრულწლოვანების საქმეთა მთავარ სამმართველოში გამოძიებაზე საპროცესო ხელმძღვანელობას და სისხლის სამართლის საქმეებზე სასამართლოში სახელმწიფო ბრალდების მხარდაჭერას განახორციელებს.

არასრულწლოვანთა სამმართველოში არასრულწლოვანთა მართლმსაჯულებაში სპეციალიზებული პროკურორები განახორციელებენ საქმიანობას“, - აღნიშნულია გავრცელებულ ინფორმაციაში.