ქვემო და ზემო სვანეთის საზღვარზე მდებარე მიწების ფლობასთან დაკავშირებით, მოსახლეობის გარკვეულ ნაწილს შორის წარმოქმნილია უთანხმოება - საპატრიარქოს განცხადება

ცაგერისა და ლენტეხის და მესტიისა და ზემო სვანეთის ეპარქიების ერთობლივი განცხადება:
"ჩვენი ეპარქიების მოსახლეობის გარკვეულ ნაწილს შორის წარმოქმნილი უთანხმოება, რომელიც დაკავშირებულია ქვემო და ზემო სვანეთის საზღვარზე მდებარე მიწების ფლობასთან, ნებსით თუ უნებლიედ, იწვევს სადავო საკითხში ეკლესიის ჩართვის მცდელობას, რადგან ამ ტერიტორიაზე მდებარეობს ლატფარის წმინდა ლუკა მახარებლის სახელობის ტაძარი.
 საკითხის მშვიდობიანი მოგვარების მიზნით, მივმართავთ რაჭა-ლეჩხუმისა და ქვემო სვანეთის და სამეგრელოსა და ზემო სვანეთის სამხარეო ადმინისტრაციებს, ასევე - ყველა შესაბამის უწყებას, რათა დროულად შეიქმნას საკითხის შემსწავლელი კომისია, რომელშიც წარმოდგენილი იქნებიან დაინტერესებული მხარეები და საბოლოოდ გადაწყვეტენ სადავო საკითხებს.
 ხელისუფლების მიერ ზუსტად დადგენილი ადმინისტრაციული საზღვრების მიხედვით ვიმოქმედებთ ჩვენც, რადგან ზემო და ქვემო სვანეთის ადმინისტრაციული საზღვარი განსაზღვრავს ჩვენი ეპარქიების იურისდიქციის ფარგლებს და, შესაბამისად, ამა თუ იმ ტაძრის კუთვნილების საკითხსაც.,,უფალმან ძალი ერსა თვისსა მოსცეს, უფალმან აკურთხოს ერი თვისი მშვიდობით" (ფს. 28; 11).
ქრისტესმიერი სიყვარულით,
თქვენთვის მლოცველნი:
სტეფანე, ჭყონდიდის, ცაგერისა და ლენტეხის მიტროპოლიტი
ილარიონი, მესტიისა და ზემო სვანეთის მიტროპოლიტი",-ნათქვამია, განცხადებაში.

ასევე დაგაინტერესებთ:

🔵რუსეთის მოქალაქეებისთვის უძრავი ქონების მიყიდვაზე მორატორიუმი უნდა გამოცხადდეს - გოგა ჩანადირი

🔵რომში კაცი, რომელმაც ბანკის გაძარცვის მიზნით 6 მეტრის სიღრმეზე გვირაბი გათხარა, თავისივე გათხრილ გვირაბში გაიჭედა