„რატომ ჩაიცვა ანაფორა?“, „არ გათიშო, გადაიღე“, „პოლიციაში უჩივლე მამა კეკელიას?“ - ვრცელდება ვიდეო, რომელშიც ჩანს, როგორ ძალადობს ერთი სასულიერო პირი მეორეზე

სოციალურ ქსელში  ვრცელდება ვიდეო, რომელშიც ჩანს, როგორ ძალადობს ერთი სასულიერო პირი მეორეზე.

ჯერჯერობით შინაგან საქმეთა სამინისტროში კომენტარი არ გაუკეთებიათ, დაიწყო თუ არა გავრცელებულ ვიდეომასალაზე გამოძიება.

ვიდეოში, ჩანს მოძალადე სასულიერო პირი მეორეს სიტყვიერ და ფიზიკურ შეურაცხყოფას აყენებს და რამდენჯერმე ეკითხება, რატომ ჩაიცვა ანაფორა. გარდა ამისა, მოძალადემ იცის, რომ ვიდეოს იღებენ და ამბობს - „არ გათიშო, გადაიღე“.

ვიდეოში მოძალადის მხრიდან ისმის მამა შალვა კეკელიას სახელიც. ის ძალადობის მსხვერპლს ეკითხება: „პოლიციაში უჩივლე კეკელიას? მამა კეკელიას უჩივლე? რატომ?"

სკანდალურ ვიდეომასალაზე, პირველ კომენტარს აკეთებს დეკანოზი შალვა კეკელია.

დეკანოზის ინფორმაციით, მორჩილი ილარიონ გრიგალაშვილი, რომელიც სოციალურ ქსელში გავრცელებულ ვიდეოში რუის-ურბნისის ეპარქიიდან განდევნილ როინ მუმლაძეზე ძალადობს, რამდენიმე თვით ადრე შეხვდა და განუცხადა, რომ მუმლაძე თავისივე მონასტერში მიიყვანა, რის შემდეგაც ვიდეო გადაუღო, წვერი გაპარსა და სასულიერო სამოსი გახადა.

შალვა კეკელიას განმარტებით, ჩანაწერში მონაწილე არცერთი პირი ბერი არ არის, კერძოდ ერთი მორჩილია, მეორე კი ბერი იყო და ახლა „ყველაფერი აკრძალული აქვს“.

,,ეს უმძიმესი და უსაშინლესი ფაქტი იყო რაც ვნახე, მიუღებელი და წარმოუდგენელია ქრისტიანი ასე იქცეოდეს. მგონია, რომ დადგმული სცენაა პირადად ჩემს წინააღმდეგ, ჩემს სახელს და გვარს ახსენებენ, რა შუაშია ჩემი სახელი და გვარი? მამა ანდრია ჯაღმაიძე მესაუბრა და მითხრა, რომ არცერთი მათგანი არ არის დღეს ბერი, ერთი მორჩილია, მეორე კი ბერი იყო და ახლა აკრძალული აქვს ყველაფერი, ორივენი რუის-ურბნისის ეპარქიაში იყვნენ.

ვინც ურტყამს, ეს ადამიანი დამიკავშირდა, მოვიდა ჩემთან და დამელაპარაკა. როგორც თავად მომიყვა, წაუყვანია თავისთან მონასტერში, ვიდეოები გადაუღია, ყველაფერი მოვაყოლეო და ეპისკოპოსებთან გადაუგზავნია, რის შემდეგაც მითხრა, გადაღებული მაქვს, რომ გავპარსე წვერი და გავხადე კაბაო. შემდეგ მკითხა ჩივილთან დაკავშირებით. რომ მითხრა ამ ვიდეოს ჩაგიგდებო, ვუთხარი, არ მაინტერესებს და შენთვის გქონდეს-თქო. რატომ უნდა მაინტერესებდეს, რატომ გახადა კაბა, არ მაინტერესებდა არანაირად“, - აღნიშნა შალვა კეკელიამ.

როგორც შინაგან საქმეთა სამინისტროში, ასევე საქართველოს საპატრიარქოში გავრცელებულ სკანდალურ ვიდეომასალაზე კომენტარი ჯერ არ გაუკეთებიათ.

ვიდეომასალა, იმდენად მძიმე და შოკის მომგვრელია, რომ მის ტირაჟირებას, ჩვენი რედაქციის გადაწყვეტილებით, არ ვახდენთ.

ასევე საინტერესოა:

🔵  „დამოუკიდებელ საგამოძიებო მექანიზმს უნდა ჰქონდეს იმ ქმედებების გამოძიების უფლებამოსილება, რომელიც სავარაუდოდ ჩადენილია მაღალი თანამდებობის პირების მიერ“ - სახალხო დამცველი

🔵  ორი შვილის დედას, 21 წლის ანი კვირკვაიას საზოგადოების დახმარება ესაჭიროება

🔵 „BA.2, ანუ ყველაზე ბოლო ვარიანტი ომიკრონის, 1,5-ჯერ უფრო გადამდებია და სწრაფად ვრცელდება“ - თენგიზ ცერცვაძე