რევაზ სოხაძე: კონტრაქტორ კომპანიებთან მიდგომა იქნება ძალიან მკაცრი, მუდმივ რეჟიმში გავაგრძელებთ ინსპექტირებას გაფრთხილების გარეშე

„ვაგრძელებთ ინფრასტრუქტურული პროექტების ადგილზე გაცნობას რეგიონებში. დღეს ვიმყოფებით შიდა ქართლში, მოვინახულეთ მიმდინარე სამუშაოები. რამდენიმე ბაღის მშენებლობასთან დაკავშირებით არსებობს გარკვეული შეფერხებები და პრობლემები, რისთვისაც ბოდიშს ვუხდი მოსახლეობას. ჩვენ მუდმივ მონიტორინგზე გვექნება ეს საკითხი, მინდა გავაფრთხილო კონტრაქტორი სამშენებლო კომპანიები, რომ მიდგომა იქნება ძალიან მკაცრი. ერთ-ერთი ბაღის ობიექტზე ჩავედით გაფრთხილების გარეშე, ამ სახის ინსპექტირებას გავაგრძელებთ მუდმივ რეჟიმში“, - განაცხადა ინფრასტრუქტურის მინისტრმა, რევაზ სოხაძემ შიდა ქართლში მიმდინარე ინფრასტრუქტურული პროექტების ადგილზე გაცნობისას.

ინფრასტრუქტურის სამინისტრო შიდა ქართლის რეგიონში სხვადასხვა ტიპის ინფრასტრუქტურის განვითარების პროექტებს ახორციელებს. მათ შორისაა, საერთაშორისო და შიდასახელმწიფოებრივი მნიშვნელობის გზების, სკოლებისა და საბავშვო ბაღების, ასევე წყალმომარაგების სისტემების მშენებლობა-რეაბილიტაცია.

სახელმწიფო ბიუჯეტის დაფინანსებით და მსოფლიო ბანკის მხარდაჭერით, საბავშვო ბაღებისა და სკოლების მშენებლობა-რეაბილიტაციის სამუშაოები მიმდინარეობს კასპის, გორის, ქარელის და ხაშურის მუნიციპალიტეტების სოფლებში.

კასპის მუნიციპალიტეტის სოფელ ლამისყანაში საბავშვო ბაღის და სოფელ არაშენდაში საჯარო სკოლის მშენებლობის მიმდინარეობას ინფრასტრუქტურის მინისტრი რევაზ სოხაძე, მოადგილეებთან, მუნიციპალური განვითარების ფონდის დირექტორთან, შიდა ქართლის მხარეში სახელმწიფო რწმუნებულ სიმონ გულედანთან და ადგილობრივი ხელისუფლების წარმომადგენლებთან ერთად, დღეს ადგილზე გაეცნო.

კასპის მუნიციპალიტეტის სოფელ ლამისყანაში 100 ბავშვზე გათვლილი საბავშვო ბაღის მშენებლობა, სახელმწიფო ბიუჯეტის დაფინანსებით, ხოლო გორის მუნიციპალიტეტის სოფელ არაშენდაში საჯარო სკოლის მშენებლობა მსოფლიო ბანკის მხარდაჭერით მიმდინარეობს.

მინისტრმა, ასევე, მოინახულა გორის წმინდა წყლის უბანში მდებარე სტადიონი და მისი მიმდებარე ტერიტორია, სადაც იგეგმება ახალი მულტიფუნქციური სპორტული კომპლექსის მშენებლობა.

მინისტრის თქმით, ადგილობრივ ხელისუფლებასთან ერთად, ასევე, დაგეგმეს შიდა ქართლში განსახორციელებელ ინფრასტრუქტურულ პროექტებთან დაკავშირებული ღონისძიებები. პრიორიტეტი იქნება ახალი სპორტული ინფრასტრუქტურის განვითარება და არსებული სპორტული ინფრასტრუქტურის პრობლემების მოგვარება.