ვარლამ ლიპარტელიანი: წლების წინ გვახსოვს ყველას, რომ ცოტა გვიჭირდა ქალთა ძიუდოში, დღეს შემიძლია თამამად ვთქვა, რომ არაფრით ჩამოუვარდებიან ისინი ბიჭებს

„მინდა, თქვენი ეთერის საშუალებით ეთერ ლიპარტელიანს განსაკუთრებული მადლობა გადავუხადო, მადლობა გადავუხადო მისი თავდაუზოგავი შრომისთვის, თავდადებისთვის“, - განაცხადა გადაცემაში „იმედი LIVE“ საპარლამენტო უმრავლესობის წევრმა, გარემოს დაცვისა და ბუნებრივი რესურსების კომიტეტის თავმჯდომარის პირველმა მოადგილემ, საზოგადოება „ქართულის“ წევრმა ვარლამ ლიპარტელიანმა.

მისივე თქმით, ზუსტად ამ თავდადებისა და შრომის შედეგია ის, რომ ამხელა წარმატებას მიაღწია ინდივიდუალურში.

„ასევე ძალიან მნიშვნელოვანია გუნდის წარმატება, გუნდის საერთო შედეგი. წლების წინ, გვახსოვს ყველას, რომ ცოტა გვიჭირდა ქალთა ძიუდოში. დღეს შემიძლია თამამად ვთქვა, რომ არაფრით ჩამოუვარდებიან ისინი ბიჭებს, თითქმის თანაბრად არიან. თუ მედლების ხარისხით შევაფასებთ, ვიტყოდი, რომ ქალთა ნაკრებს ოქრო აქვს და ბიჭების ნაკრებს ოქრო არ აქვს. ეს, რა თქმა უნდა, სასიხარულოა და ძალიან დიდი წარმატება. მინდა თითოეულ მათგანს მივულოცო.

რაც შეეხება უშუალოდ ეთერის მაგალითს, ვიტყოდი, რომ მის მაგალითზე უამრავი ახალი თაობა წამოვა, უამრავი ადამიანი დაისახავს მიზნად, რომ გახდეს ზუსტად ისეთი, როგორიც ის არის. ეს მხოლოდ სასიხარულოა.

დავამატებ, რომ ეს ყველაფერი იმ გუნდის, იმ ხელისუფლების შედეგია, რომელმაც ყველაზე გრძელვადიანი მშვიდობა მოიტანა ყველა მიმართულებით. განსაკუთრებით სპორტის მიმართულებით უამრავი წარმატება გვაქვს არა მხოლოდ ინდივიდუალურ სახეობებში, არამედ, გუნდურ სახეობებშიც. რა თქმა უნდა, ეს არის იმის შედეგი, რომ სწორი მიმართულებით, სწორი პოლიტიკით მიდის ეს ყველაფერი. განსაკუთრებით, როდესაც პრემიერმა განაცხადა, რომ სპორტი არის ჩვენი პრიორიტეტი, იმ დღიდან დაწყებული უდიდესი ყურადღება ექცევა სპორტს და ჩვენ შედეგებზეც ვხედავთ. მადლობა ისევ და ისევ მათ. ეთერს ახლა წითელი საზურგე აქვს და ვუსურვებ, 2028 რვაში ოქროსფერი საზურგით დაბრუნებულიყოს ოლიმპიური ჩემპიონის სტატუსით“, - აღნიშნა ვარლამ ლიპარტელიანმა.