დაკავებულია “ბადანტე” მოხუცის გაქურდვის ბრალდებით

10 000 ევრო და ძვირფასეულობა. ეს არის ნაქურდალი, რომელიც სამართალდამცველებმა 31 წლის "ბადანტის" სახლში აღმოაჩინეს. შემთხვევა იტალიაში, სასარიში მოხდა.

ახალგაზრდა ქალი, გარკვეული პერიოდი მოხუც ქალბატონთან მუშაობდა, რომელიც მარტო ცხოვრობდა. მომვლელმა მოკლე დროში მოახერხა მოხუცის ნდობის მოპოვება, რომლითაც შემდგომ სარგებლობა სცადა. 

"ბადანტე" მოხუცს საფულიდან შეუმჩნევლად ბანკის ბარათს ჰპარავდა კოდთან ერთად და ახლომდებარე ბანკომატებიდან გარკვეულ თანხას ხსნიდა. საერთო ჯამში, 20 დღის განმავლობაში ქალმა დაახლოებით 10 000 ევრო მოხსნა ანგარიშიდან.

განგაშის ზარს ბანკმა შემოჰკრა, როდესაც კლიენტის საბანკო ანგარიშზე ანომალიური და უჩვეულო ტრანზაქციები დაფიქსირდა. ბანკი კლიენტს სასწრაფოდ დაუკავშირდა. მოხუცმა თავის მხრივ დახმარება შვილიშვილს სთხოვა. საბოლოოდ გაირკვა, რომ ანგარიშიდან დიდი თანხა მოხუცის ნებართვის გარეშე იყო მოხსნილი.

პოლიცია სათვალთვალო ვიდეოკამერების შემოწმების შემდეგ, მალევე გავიდა "ბადანტის" კვალზე. ქალის ბინის ჩხრეკის შედეგად სამართალდამცველებმა 8800 ევრო ნაღდი ფული და მოხუცის კუთვნილი ოქროული იპოვეს. მათ შორის ერთი განსაკუთრებული ღირებულების მქონე ბრილიანტის ბეჭედი. 

"ბადანტეს" ბრალი ქურდობის (დამამძიმებელი გარემოებით) მუხლით წაუყენეს.