იტალია საგანგებო მდგომარეობას აღარ გააგრძელებს?!

გასული წლის დეკემბერში, იტალიის მთავრობამ საგანგებო მდგომარეობის 2022 წლის 31 მარტამდე გაგრძელების გადაწყვეტილება მიიღო, საჭიროების შემთხვევაში, კიდევ გახანგრძლივების პერსპექტივით. თუმცა, ირკვევა, რომ საგანგებო მდგომარეობა, დიდი ალბათობით, 31 მარტის შემდეგ, აღარ გაგრძელდება. ასევე შეწყდება დაინფიცირების მაჩვენებლის მიხედვით რეგიონებისთვის ფერების მინიჭება.

ორწლიანი შეზღუდვების შემდეგ, როგორც ჩანს იტალიისთვისაც გამოჩნდა სინათლე გვირაბის ბოლოს. რამდენიმე დღის წინ, შეზღუდვების შემსუბუქების აუცილებლობაზე, ჯანდაცვის მინისტრის მოადგილე პიერპაოლო სილერიმ ისაუბრა. "პიკს ვუახლოვდებით, ეს იმას ნიშნავს, რომ კიდევ რამდენიმე დღე დაინფიცირების მაღალი მაჩვენებელი გვექნება, შემდეგ კი კლებას დაიწყებს, ისევე როგორც დიდ ბრიტანეთში. უკვე თითქმის 30 მილიონი ადამიანი აიცრა ბუსტერით, ან კოვიდისგან გამოჯანმრთელების შემდეგ პირველი დოზით, ეს ძალიან ბევრს ნიშნავს ქვეყნისთვის," -  განაცხადა მაშინ პიერპაოლო სილერიმ. 

სულ ცოტა ხნის წინ კი, გავრცელდა ინფორმაცია, რომ შეზღუდვების გავრცელება საჭირო აღარ იქნება. "თითოეული ტალღა დაახლოებით 40-60 დღის განმავლობაში გრძელდება. 31 მარტისათვის ტალღა გადავლილი იქნება და ახალი შეზღუდვების დაწესება საჭირო აღარ გახდება,"- აცხადებს სილერი.