იტალიელმა მოხუცმა კარაბინერებს საკუთარი "ბადანტე" დააჭერინა

შემთხვევა იმოლაში, ბოლონიასთან ახლოს მოხდა. ზინამ, 90 წლის იტალიელმა მოხუცმა, კარაბინერებს საკუთარი მომვლელი, ე.წ. „ბადანტე“ დააჭერინა. საქმე ქურდობის მუხლით აღიძრა.

მოხუცმა შეამჩნია, რომ პირადი საბანკო ანგარიშიდან ფული აკლდებოდა და სასწრაფოდ კარაბინერებს შეატყობინა. 48 წლის მომვლელი, რომელიც წარმოშობით აღმოსავლეთ ევროპის ერთ-ერთი ქვეყნიდანაა, გარკვეული პერიოდის განმავლობაში სისტემატურად, თვითნებურად ხსნიდა თანხას მოხუცის ანგარიშიდან, როგორც ჩანს იმ იმედით, რომ ასაკის გამო, მისი დამსაქმებელი, ვერაფერს იეჭვებდა. მაგრამ მიუხედავად მოხუცებულობისა, დაზარალებული საღ გონებაზეა და მეხსიერებასთან დაკავშირებულ პრობლემებს არ უჩივის. 

მოპარულმა თანხამ, ერთი თვის განმავლობაში 1200 ევრო შეადგინა. მოხუცი ზუსტად მიხვდა, რომ იმ მცირე პერიოდში, აღნიშნულ თანხას ვერ დახარჯავდა, რადგან ქვრივია და ფაქტობრივად მარტო ცხოვრობს.

როგორც საბანკო ამონაწერიდან ჩანს, თანხის მოხსნა ყოველდღიურად, სამიდან ხუთ საათამდე ხდებოდა, რაც ემთხვევა დღის იმ მონაკვეთს, როდესაც მომვლელი გარეთ ნაგვის გადასაყრელად გადიოდა. ამ ფაქტმა, სამართალდამცველების ეჭვი, უფრო გააღრმავა.

კარაბინერებმა „ბადანტე“ ფაქტზე დაიჭირეს, სწორედ მაშინ, როდესაც ქალი ბანკომატიდან ფულის მოსახსნელად მიდიოდა. ჩხრეკის შედეგად მას საფულეში მოხუცის საბანკო ბარათი აღმოუჩინეს, ხოლო სახლში - ძვირფასი სუნამოები და სხვა ნივთები, რომელიც სწორედ აღნიშნული საკრედიტო ბარათით იყო შეძენილი .ბრალდებულისთვის გარემოება დამამძიმებელია იმ ფაქტის გათვალისწინებით, რომ მან სცადა ესარგებლა ასაკოვანი ადამიანის უსუსურობით.

საქმის დასასრულს, კარაბინერებმა თანამშრომლობის, დროული რეაგირებისა და მოქმედებისათვის მოხუცს მადლობა გადაუხადეს, ყვავილების თაიგული მიართვეს და მასთან სამახსოვრო ფოტოც გადაიღეს.

მოამზადა ნინა მამუკაძემ