ქალმა 1 130 კილომეტრი გაიარა, რომ 9 წლის შვილი აეცრა

ინგლისელმა ქალმა ალისა ჩეპმან-ჰეტჩეტმა, მეუღლესთან და შვილთან ერთად დიდი ბრიტანეთიდან იტალიამდე მანქანით 1 130 კილომეტრი გაიარა, რათა საკუთარი 9 წლის შვილი კოვიდის საწინააღმდეგო ვაქცინით აეცრა. იქიდან გამომდინარე, რომ დიდ ბრიტანეთში12 წლის ქვემოთ, ჯერჯერობით მხოლოდ განსაკუთრებული საჭიროების მქონე ბავშვებს ცრიან, ქალმა ისარგებლა იმით, რომ მისი მეუღლე იტალიელია და შვილი ასაცრელად იტალიაში ჩაიყვანა. წყვილს სურს, როდესაც სასწავლო პროცესი განახლდება, მათი შვილი სკოლაში ყველანაირად დაცული დაბრუნდეს.

ბავშვს ვაქცინის პირველი დოზა 14 დეკემბერს გაუკეთდა, ხოლო მეორე აცრა 7 იანვარს აქვს დანიშნული. წყვილმა იტალია იმიტომ აარჩია, რომ იქ 5 წლის ზემოთ ბავშვების ვაქცინაცია დაშვებულია. რაც შეეხება იმას, თუ რატომ გაიარეს ამხელა გზა მანქანით, ქალმა განაცხადა, რომ შექმნილ ვითარებაში, პირადი ავტომობილი, ყველაზე უსაფრთხო გადაადგილების საშუალებაა.

ქალის განცხადებით თავად ბავშვიც ძალიან კმაყოფილი იყო, მისთვის ვაქცინაცია ჩვეულებრივი მოვლენაა, რადგან მისმა იტალიელმა ბიძაშვილებმაც გაიკეთეს აცრა და შესანიშნავად ესმის, რომ ვაქცინაცია პირველ რიგში თავდაცვის, ხოლო შემდეგ, გარშემომყოფების დაცვის საუკეთესო ფორმაა.