რა შემთხვევაშია “ბადანტე” ვალდებული, გააკეთოს წლიური დეკლარაცია

რა შემთხვევაშია “ბადანტე” ვალდებული, გააკეთოს წლიური დეკლარაცია?

იტალიაში, ოჯახებში დასაქმებული პირები, იქნება ეს მოხუცის მომვლელი, ოჯახის დამხმარე, თუ ძიძა, ვალდებულნი არიან, გააკეთონ შემოსავლების ყოველწლიური დეკლარაცია. 

მაგრამ გასათვალისწინებელია, რომ დეკლარაციის გაკეთება სავალდებულოა, თუ პირის ყოველწლიური შემოსავალი აჭარბებს 8000 ევროს. თანხის გადამოწმება შესაძლებელია CU-ს (certificazione unica) საშუალებით, რომელსაც დამსაქმებელი აწვდის დაქირავებულ პირს. 

თუმცა, სურვილის და საჭიროების შემთხვევაში, დეკლარაცია შეგიძლიათ შეავსოთ მაშინაც, როდესაც თქვენი წლიური შემოსავალი ვერ აღწევს 8000 ევროს. ეს იმ შემთხვევაშია ხელსაყრელი, თუ თქვენს კმაყოფაზე ცხოვრობენ მეუღლე და შვილები. ამ გზით გადასახადები შეგიმცირდებათ. ეს იმ შემთხვევაში ხდება, თუ თქვენს კმაყოფაზე მყოფი ოჯახის წევრის შემოსავალი წელიწადში არ აღემატება 2 841 ევროს, ხოლო 24 წლამდე შვილის შემთხვევაში 4000 ევროს.

ამ საბუთის გაკეთება შესაძლებელია ფისკალური მომსახურების ცენტრებში (CAF)

საჭირო საბუთები:

• წინა წლის CU, რომელსაც დამსაქმებელი გაძლევთ;
• დამსაქმებლის მიერ INPS-ში გადახდილი გადასახადის, იგივე "კონტრიბუტების" ქვითრები;
• თქვენს კმაყოფაზე მყოფი ოჯახის წევრების ფისკალური კოდი და ცნობა ოჯახური მდგომარეობის შესახებ;
• სასკოლო ხარჯების ქვითრები;
• სამედიცინო ხარჯების ქვითრები;
• სახლისთვის გაწეული ხარჯების დამადასტურებელი საბუთები (ბონუსი შეძენისთვის, რემონტისთვის და ა.შ.)