რას აპროტესტებს ასიათასობით იტალიელი მოსწავლე

დღეს, 4 თებერვალს იტალიის სხვადასხვა ქალაქების 40-ზე მეტ მოედანზე, სკოლის დამამთავრებელი კლასის დაახლოებით 100 000 მოსწავლე გამოვიდა. ისინი, განათლების სამინისტროს გადაწყვეტილებას აპროტესტებენ, რომელიც საატესტატო გამოცდებში შესულ ცვლილებებს ეხება.

მთავარი საპროტესტო გამოსვლა რომში, განათლების სამინისტროს წინ გაიმართა, თუმცა, მოსწავლეების არანაკლები რაოდენობა იყო მილანის, გენუას, ვენეციის, პალერმოს, ფლორენციის, ბარის, პერუჯას და სხვა ქალაქების მოედნებზე. ჯამში საპროტესტო ტალღაში 18 რეგიონის 50-მდე ქალაქი ჩაერთო.

საქმე იმაში გახლავთ, რომ პანდემიის დაწყების პირველ წელს, სკოლის დამამთავრებელი გამოცდებიდან მოიხსნა წერითი გამოცდა და დარჩა მხოლოდ ზეპირი. ეს ერთი მხრივ  კოვიდ უსაფრთხოების ზომებიდან გამომდინარეობდა, ხოლო მეორე მხრივ სამინისტრო შევიდა მოსწავლეების მდგომარეობაში, რომლებმაც სასწავლო წელი დისტანციურ რეჟიმში გაატარეს და მათთვის რთული იქნებოდა წერითი გამოცდის გადალახვა. 

სულ რამდენიმე დღის წინ, ანუ სასწავლო წლის მეორე სემესტრის მიმდინარეობისას, განათლების სამინისტრომ დამამთავრებელ გამოცდებზე ისევ დაუშვა წერითი გამოცდა. რასაც მოსწავლეების მხრიდან მწვავე პროტესტი მოჰყვა. მათი განცხადებით, გადაწყვეტილება უპასუხისმგებლოა, რადგან მათ ბოლო ორი წელი მთლიანად, ხოლო მიმდინარე სასწავლო წელი, ნახევრად დისტანციურ რეჟიმში მოუწიათ სწავლა და სკოლას არ უნდა ჰქონდეს მათ მიერ წერითი გამოცდის ჩაბარების პრეტენზია.