"ომიკრონი" შესაძლოა 5-7 მეტრზეც კი გავრცელდეს - ის გავრცელების სიმარტივით "წითელას" ჰგავს

"გავრცელების სიმარტივით ომიკრონი წითელას ჰგავს და კორონავირუსის ეს შტამი, შესაძლოა, დაინფიცირებული ადამიანიდან 5-7 მეტრის მანძილზე მყოფ ადამიანს გადაედოს იმ შემთხვევაში, თუ მათ პირბადე არ უკეთიათ ან წესების დარღვევით მოიხმარენ", - ამის შესახებ ინფექციონისტმა ალექსანდრე გოგინავამ განაცხადა.

ალექსანდრე გოგინავა ამბობს, რომ ომიკრონის შემთხვევაში დაინფიცირების რისკები გაზრდილია არა მხოლოდ ამ შტამის მაღალი გადამდებლობის, არამედ იმის გამოც, რომ საზოგადოებრივ სივრცეებში, მათ შორის მაღაზიებში, მოქალაქეები დისტანციას აღარ იცავენ, შიდა სივრცეებში ხდება დასაშვებზე მეტი ადამიანის თავმოყრა.

გარდა ამისა, ინფექციონისტის თქმით, ადამიანები პირბადეს წესების დაცვით აღარ ატარებენ – ექიმის რეკომენდაციაა, სამედიცინო პირბადე ყოველ საათში, მაქსიმუმ კი 2-3-საათიანი მოხმარების შემდეგ გამოვცვალოთ, რადგან ხანგრძლივი ხმარების შემთხვევაში ის კარგავს დამცველობით უნარს.

"ახლა ადამიანები იმდენად აღარ იცავენ უსაფრთხოების ზომებს, როგორც ეს ადრე იყო – თქვენ გახსოვთ, რომ მაღაზიებში დიტანცია იყო დაცული, ახლა კი რიგები დგას, დისტანციაც დარღვეულია, ხშირად ადამიანებს პირბადე არ უკეთიათ ან უჭირთ მისი ხშირ-ხშირად გამოცვლა.

იდეალურია, თუ პირბადეს ყოველ ერთ საათში გამოვიცვლით, თუმცა 2-3 საათში მაინც აუცილებლად უნდა შევცვალოთ, რადგან დიდი ხნის გამოყენებული პირბადე წვეთებისთვის ბარიერი აღარაა", – განაცხადა ალექსანდრე გოგინავამ.

მისი განმარტებით, ინფიცირებულებისა და არაინფიცირებულების მიერ ნიღბის სწორად ტარება დაავადების გადაცემის რისკს 50-60%-ით ამცირებს, რაც საკმაოდ კარგი მაჩვენებელია.

ჯანდაცვის სამინისტროს მონაცემებით ვირუსი ადამიანის ორგანიზმში შემდეგი სამი გზით ხვდება:

1. ძალიან წვრილი რესპირაციული წვეთების და აეროზოლის ნაწილაკების ინჰალაცია (შესუნთქვა) .

2. რესპირაციული წვეთების და ნაწილაკების პირდაპირი მოხვედრა პირის, ცხვირის ან თვალის დაუცველ ლორწოვან გარსებზე;

3. ლორწოვან გარსებზე ხელით შეხება, რომლებიც დაბინძურებულია უშუალოდ ვირუსის შემცველი რესპირაციული სეკრეტით ან ხელი შეეხო იმ ზედაპირს, რომელზედაც ვირუსი მოხვდა.

სხვა სიახლეები:

🔲 რევაზ ბოჭორიშვილი: ცრუ უარყოფითი პასუხების სიმრავლე ტესტის არასწორად გაკეთების შედეგია, რადგან საფრანგეთში ტესტის 99%-ი სწორედ "ომიკრონის" შემთხვევას ადასტურებს

🔲 პოლიციამ მარნეულში განზრახ მკვლელობის ფაქტი ცხელ კვალზე გახსნა, დაკავებულია ერთი პირი

🔲 სელფები მოპარულ ევროებთან - ბარში შეიარაღებული დაჯგუფება დააკავეს