მეუფე სპირიდონის ბევრისთვის უცნობი დეტალები (ვიდეო)

სოციალურ ქსელში, პირველი პრეზიდენტის ზვიად გამსახურდიას შვილი, კონსტანტინე გამსახურდია წერს მეუფე სპირიდონზე (გოჩა აბულაძე), რომელიც საქართველოს დამოუკიდებლობას ითხოვს.

მისი თქმით, პოლიტიკური კონიუნქტურების გამო არ არის სწორი, დაუსაბუთებელი ბრალდებების გამოთქმა იმ ადამიანების მიმართ, ვისაც გარკვეული წვლილი აქვს შეტანილი საქართველოს დამოუკიდებლობისთვის ბრძოლაში.

„80-იანი წლების ბოლოს დაწყებული უკვე მასობრივ ეროვნულ-განმანთავისუფლებელ მოძრაობაში (ამას აღვნიშნავ, რადგან ჰელსინკის ჯგუფი და მისი მონათესავე დისიდენტთა ჯგუფები მანამდეც არსებობდნენ) მონაწილეობდა ბევრი ჩვენი მეგობარი და თანამებრძოლი. ჩვენს მიერ მოძიებულ და წარმოდგენილ ფირზე ვხედავთ ეროვნულ-განმანთავისუფლებელი მოძრაობის სულისჩამდგმელ ლიდერებს მერაბს და ზვიადს, ასევე მათ თანამებრძოლებს: კადრში ზვიადის მარჯვნივ დგას აწ გარდაცვლილი ვანო ხუხუნაიშვილი, მისგან მარჯვნივ ირაკლი შენგელაია, ზვიადის მარცხნივ ორატორი გოჩა აბულაძე (ამჟამად მთავარეპისკოპოსი სპირიდონი) მისგან მარცხნივ დგას ვაჟა მთავრიშვილი, დისიდენტური მოძრაობიდან, გოჩა აბულაძის წინ თემურ ქორიძე, მისგან მარცხნივ გურამ გოგბაიძე (აწ განსვენებული) მერაბ კოსტავას მარჯვნივ დგას გოგა გოგნიაშვილი, მის უკან დგას ზვიად ქადარია, გოჩა აბულაძის უკან დგას კოკა გაწერელია, ვაჟა მთავრიშვილის მარჯვნივ დგას ნიკო ნორაკიძე.

ადამიანები, რომლებიც იბრძოდნენ კომუნისტური ტოტალიტარიზმის წინააღმდეგ, წარმოადგენენ იმ მეხსიერებას, რომელიც აუცილებელია ყველა ქვეყნის და ყველა ერის განვითარებისათვის. დღეს არსებული პოლიტკორექტულობის, ან სხვადასხვა პოლიტიკური კონიუნქტურების გამო არ მიგვაჩნია მიზანშეწონილად დაუსაბუთებელი ბრალდებების გამოთქმა იმ ადამიანების მიმართ, ვისაც გარკვეული წვლილი აქვს შეტანილი საქართველოს დამოუკიდებლობისთვის ბრძოლაში.

მეორეს მხრივ, არ მიგვაჩნია მიზანშეწონილად ყოველგვარი პოლიტიკურად მოტივირებულ განცხადებები ეკლესიის და სასულიერო პირთა წინააღმდეგ. თანამედროვე ეპოქაში საქართველო თავის ევროპულ გზაზე აუცილებლად საჭიროებს საზოგადოების ჰარმონიულ განვითარებას, მშვიდობას, პოლიტიკურ ჯგუფებს შორის შიდა დიალოგს, ასევე ტოლერანტობის სულისკვეთებას.”, – წერს კონსტანტინე გამსახურდია.