ადამიანის უფლებათა დაცვისა და სამოქალაქო ინტეგრაციის კომიტეტმა „საერთაშორისო დაცვის შესახებ“ კანონპროექტს მხარი დაუჭირა

ადამიანის უფლებათა დაცვისა და სამოქალაქო ინტეგრაციის კომიტეტმა მხარი დაუჭირა „საერთაშორისო დაცვის შესახებ“ კანონპროექტს და გამომდინარე კანონპროექტებში შესატან ცვლილებებს.

საქართველოს შინაგან საქმეთა მინისტრის მოადგილის ალექსანდრე დარახველიძის განმარტებით, კანონპროექტის მომზადების დროს გამოყენებულ იქნა ევროკავშირის შესაბამისი დირექტივები.

მისივე თქმით, კანონპროექტის მიღების შედეგად დაიხვეწება საერთაშორისო დაცვის მინიჭებასთან დაკავშირებული საკითხები.

პროექტის თანახმად, უცხოელს ან მოქალაქეობის არმქონე პირს უფლება ექნება საერთაშორისო დაცვა მოითხოვოს მშობლიურ ან მისთვის გასაგებ ენაზე, საქართველოს ტერიტორიაზე ყოფნისას, მხოლოდ სამინისტროს მიგრაციის დეპარტამენტში.

საერთაშორისო დაცვა აგრეთვე შეიძლება მოთხოვნილი იქნეს: საქართველოს სახელმწიფო საზღვრის უკანონოდ გადაკვეთის შემთხვევაში, შინაგან საქმეთა სამინისტროს სასაზღვრო კონტროლის განმახორციელებელ უფლებამოსილ ორგანოში; სასაზღვრო პროცედურის შემთხვევაში, საქართველოს შინაგან საქმეთა სამინისტროს სასაზღვრო კონტროლის განმახორციელებელ უფლებამოსილ ორგანოში; უცხოელის ან მოქალაქეობის არმქონე პირის პენიტენციურ დაწესებულებაში ყოფნისას, პენიტენციურ დაწესებულებაში.

როგორც მომხსენებელმა აღნიშნა, ყველა განცხადება გაივლის დასაშვებობის პროცედურას. კერძოდ, განცხადების არსებით განხილვაზე გადაწყვეტილების მიღებამდე მოხდება განცხადებების წინასწარი „სკრინინგი“, რითაც შესაძლებელი გახდება ცალკეული განცხადებების საწყის ეტაპზევე გაფილტვრა და თავშესაფრის სისტემის განტვირთვა.

კანონით განისაზღვრება განცხადების დაუშვებლად ცნობის საფუძვლები. დასაშვებობის პროცედურის ეფექტიანად განხორციელების მიზნით, საკანონმდებლო დონეზე გაიწერება უსაფრთხო მესამე ქვეყნის ცნება. მნიშვნელოვანია, რომ ქვეყნის უსაფრთხო მესამე ქვეყნად მიჩნევისთვის აუცილებელია ამ ქვეყანაში უცხოელის ან მოქალაქეობის არმქონე პირის სიცოცხლეს ან თავისუფლებას არ შეექმნას საფრთხე მისი რასის, რელიგიის, ეროვნების, გარკვეული სოციალური ჯგუფისადმი კუთვნილების ან პოლიტიკური შეხედულების გამო, დაცული იქნეს არაადამიანური და დამამცირებელი მოპყრობისაგან, არგაძევების პრინციპის დარღვევით არ მოხდეს მისი ამ ქვეყნიდან გაძევება. ამასთან, ამ ქვეყანაში პირს უნდა მიეცეს ლტოლვილის სტატუსის მოთხოვნისა და მისთვის ასეთი საჭიროების დადგენის შემთხვევაში, შესაბამისი დაცვის მიღების შესაძლებლობა.

კომიტეტმა მხარი დაუჭირა წარდგენილ კანონპროექტს და საკანონმდებლო პაკეტს.