ადვოკატი: მეგის ქარდავა მის მიმართ წაყენებულ არც ერთ ბრალდებას არ აღიარებს

უკრაინიდან ექსტრადირებული საქართველოს თავდაცვის სამინისტროს სამხედრო პოლიციის ყოფილი უფროსი მეგის ქარდავა, მის ადვოკატ მალხაზ ველიჯანაშვილს დღეს რუსთავის მე–12 პენიტენციურ დაწესებულებაში შეხვდა.

ადვოკატის თქმით, მათ განიხილეს დაცვის შემდგომი სტრატეგია.

როგორც ქარდავას ადვოკატი აცხადებს, ქარდავა უკრაინიდან პროცედურების უხეში დარღვევით იყო ექსტრადირებული, რაზედაც მისი ინფორმაციით, მეგის ქარდავა სოციალური ქსელის მესვეობით გაავრცელებს მიმართვას.

"განაჩენები ყველა გასაჩივრდება იმ ვადაში, რაც კანონით არის დადგენილი. მისი პოზიცია უცვლელია, ის კვლავაც არ აღიარებს არც ერთ ბრალდებას. დარღვეულია მისი უფლება იმიტომ, რომ ყველაზე მთავარი უფლება თავშესაფრის მაძიებელი იყო და სტატუსი არ ჰქონდა მინიჭებული, არც უარი ჰქონდა ნათქვამი უკრაინას. ამის მიუხედავად განხორციელდა ექსტრადირება. ასეთი დარღვევა საქართველოშიც კი არ ხდება", – განაცხადა ადვოკატმა.

უფრო დეტალურად პოლიტიკური გადაწყვეტილებისა და ყოფილი ჩინოვნიკების შეწყალების შესახებ ქარდავა თავის განცხადებაში ისაუბრებს, რომელი მისმა ადვოკატმა დააანონსა.

საქართველოს პროკურატურა უკრაინიდან მეგის ქარდავას ექსტრადიციას სისხლის სამართლის 11 საქმეზე მოითხოვდა, რომლებშიც ის ფიგურირებს, როგორც ერთ-ერთი ბრალდებული. ხუთ დანაშაულზე მას უკვე გამოუტანეს გამამტყუნებელი განაჩენი დაუსწრებლად, ხოლო ექვსი თბილისის საქალაქო სასამართლოს წარმოებაშია.