არსებული ინფორმაციით, თორნიკე რიჟვაძე საგარეჯოდან თბილისის კლინიკაში გადაიყვანეს

არსებული ინფორმაციით, თორნიკე რიჟვაძე „საგარეჯოს ჰოსპიტალიდან“ თბილისის კლინიკაში გადმოიყვანეს.

მისი ჯანმრთელობის მდგომარეობა სტაბილურად მძიმეა. მას გულმკერდის არეში ცეცხლნასროლი ჭრილობა აღენიშნებოდა.

საქმეზე გამოძიება თვითმკვლელობამდე მიყვანას მუხლით მიმდინარეობს. ცეცხლსასროლი იარაღის დაუდევრად შენახვისთვის დაკავებულია ალეკო ახვლედიანი.

ადგილზე ვითარებას გაეცნო შინაგან საქმეთა მინისტრი. საავადმყოფოში იმყოფებოდა ჯანდაცვის მინისტრიც.

მედიაში ვრცელდება ინფორმაცია წერილის შესახებ.

„პრაიმტაიმი“ წერს, რომ თორნიკე რიჟვაძემ თვითმკვლელობის მცდელობამდე წერილი დაწერა, რომელიც მის ტანსაცმელში სამედიცინო პერსონალმა აღმოაჩინა. რიჟვაძე აქცენტს რამდენიმე საკითხზე აკეთებს, მათ შორის წერს, რომ მას კორუფციას და „ბარიგების“ მფარველობას აბრალებდნენ. აჭარის მთავრობის ყოფილი თავმჯდომარე ბიძინა ივანიშვილს და ირაკლი კობახიძეს მიმართავს, რომ დაიცვან მისი ოჯახი.რიჟვაძე წერილში ასევე აღნიშნავს, რომ ყველა მისი თანამშრომელი და გარემოცვის წევრი უდანაშაულოა და ყველა „მისი დავალებით მოქმედებდა“. მადლიერებით და პოზიტიურად საუბრობს ალექსანდრე ახვლედიანზე, რომლის იარაღითაც მან თვითმკვლელობა სცადა.