"აუცილებელია, ახლობელი ადამიანის გარდაცვალების შემთხვევაში, მათ ამის შესახებ მედიიდან არ შეიტყონ" - ჟურნალისტური ეთიკის ქარტია განცხადებას ავრცელებს

სოციალურ ქსელსა და სხვადასხვა მედიასაშუალებაში გავრცელდა დაუდასტურებელი ინფორმაცია იმის შესახებ, რომ ბელგიაში მცხოვრები ქართველი ტრანსგენდერი ქალი, ლიზა ქისტაური მოკლეს.

თუმცა, ოჯახის წევრები და ახლობლები ინფორმაციას არ ადასტურებენ.

"მე ვერ ვამბობ, რომ ჩემი შვილი მკვდარია, თქვენ როგორ შეგიძლიათ?", — ამბობს ტრანსგენდერი ქალის დედა, იზა არღვლიანი რადიო თავისუფლებასთან და გავრცელებული ცნობების გამო მედიასაშუალებებს აკრიტიკებს.

აღნიშნულ ინფორმაციას ეხმაურება საქართველოს ჟურნალისტური ეთიკის ქარტია.

"2022 წლის 5 იანვარს სხვადასხვა მედიასაშუალების მიერ გავრცელდა ინფორმაცია ბელგიაში მცხოვრები ლიზა ქისტაურის მკვლელობის შესახებ.

ამ დრომდე [23:50, 05.01.2023] ლიზა ქისტაურის გარდაცვალება არ დაუდასტურებიათ არც მისი ოჯახის წევრებს და არც საქართველოს საგარეო საქმეთა სამინისტროს.

არ არსებობს არცერთი ოფიციალური წყარო, რომელიც ქალის გარდაცვალებას ადასტურებს.

ქარტიის საბჭო მოუწოდებს მედიასაშუალებებს, თავი შეიკავონ გადაუმოწმებელი და დაუდასტურებელი ინფორმაციის გავრცელებისგან.

ამასთან, მნიშვნელოვანია გაშუქების დროს მოხდეს ბალანსის დაცვა საზოგადოებრივ ინტერესსა და ეთიკურ გაშუქებას შორის.

მედია თანამგრძნობი უნდა იყოს ამგვარი მოვლენების მონაწილე პირების მიმართ და თავი უნდა აარიდოს პირის პირადი ცხოვრების ხელშეუხებლობის უფლების დარღვევას.

ქარტიის საბჭო მიიჩნევს, რომ აუცილებელია, მედიამ გაითვალისწინოს ოჯახის წევრები და ახლობელი ადამიანის გარდაცვალების შემთხვევაში, მათ ამის შესახებ მედიიდან არ შეიტყონ", — ნათქვამია განცხადებაში.

საქართველოს საგარეო საქმეთა სამინისტროში აცხადებენ, რომ საელჩოში ოფიციალური შეტყობინება არ შესულა, თუმცა ბელგიაში საქართველოს საკონსულო ადგილობრივ სამართალდამცველებთან კონტაქტზეა და სიტუაციას არკვევს.