"ჩემთვის დარჩებით სამაგალითო მოსამართლედ და ადამიანად" - ლონდა თოლორაია გარდაცვლილ მოსამართლეს ემშვიდობება

სახელმწიფო ინსპექტორი ლონდა თოლორაია, მოსამართლე დალი მეტრეველის გარდაცვალების ფაქტთან დაკავშირებით სოციალურ ქსელ "ფეისბუკში" ემოციურ პოსტს აქვეყნებს:

“2007 წელს, სტაჟიორ-პროკურორი, რომ ვიყავი და ფეხაკრეფით დავდიოდი სასამართლოში, შეშინებული – რამე არ შემშლოდა, მოსამართლე დალი მეტრეველმა დამიძახა, მასთან ახლოს მისვლა მთხოვა და მადლობა გადამიხადა სახელმწიფო ბრალდების კვალიფიციური მხარდაჭერისთვის.

განა რა კვალიფიკაცია დაინახა ახალბედა სტაჟიორში, მაგრამ მან ზუსტად იცოდა როგორი ჯადოსნური სიტყვები უთხრა პატარა გოგოს, რომელსაც თავდაჯერებულობისთვის და მართლაც კვალიფიციურ პროკურორად ჩამოყალიბებისთვის, ეს როგორ სჭირდებოდა.

ამის შემდეგ იყო ბევრი პროცესი, ბევრი პირადი ურთიერთობა, ბევრი სამოტივაციო შემოძახება (სასამართლოში და მის გარეთ) და განსაკუთრებული დამოკიდებულება, რომელსაც მისგან ყოველთვის ვგრძნობდი.

პრინციპში რა დიდი ნიჭი უნდოდა ამის შეგრძნებას, ადამიანი ღიად გამოხატავდა და სახეზე ეწერა ყველა ემოცია – სიყვარული, სითბო, თანადგომა.

ყოველთვის მემახსოვრებით.

ჩემთვის დარჩებით სამაგალითო მოსამართლედ და ადამიანად Dali Metreveli”,- წერს ლონდა თოლორაია.

მოსამართლე დალი მეტრეველი ბოლო წლებში მძიმე სენს ებრძოდა.

თბილისის საქალაქო სასამართლომ სამძიმრის შესახებ განცხადება გაავრცელა. გარდაცვლილის ოჯახს უსამძიმრებს ადვოკატთა ასოციაციაც.

მოსამართლე დალი მეტრეველი 2000-2003 წლებში მუშაობდა საქართველოს შსს საგამოძიებო დეპარტამენტში გამომძიებლის თანამდებობაზე. 2003-2006 წლებში გაგრის საქალაქო სასამართლოს მოსამართლე იყო. 2006-2016 წლებში თბილისის საქალაქო სასამართლოს სისხლის სამართლის საქმეთა კოლეგიის მოსამართლე იყო. 2017 წლის მაისიდან იყო თბილისის საქალაქო სასამართლოს საგამოძიებო და წინასასამართლო სხდომის კოლეგიის მოსამართლე. 2019 წლის ოქტომბრიდან თანამდებობაზე გამწესებული იყო უვადოდ.

ამავე თემაზე:

🔵 "ჩემი დაცვის ქვეშ მყოფი პირი გაამხნევა, მოტივაცია მისცა და ისე დაარიგა, მხოლოდ დედა რომ შეძლებდა და გაბედავდა" - მარიამ კუბლაშვილი გარდაცვლილ მოსამართლეზე ემოციურ პოსტს აქვეყნებს

🔵 მაგრად მიყვარხარ, მაგრად მომენატრები შევხვდებით იქ - ნოდარ მელაძე გარდაცვლილ მოსამართლეს ემშვიდობება