დავით სონღულაშვილი საფრანგეთში, ქალაქ ნიცაში გაეროს მაღალი დონის კონფერენციაზე სიტყვით გამოვიდა

დავით სონღულაშვილი საფრანგეთში, ქალაქ ნიცაში გაეროს მაღალი დონის კონფერენციაზე სიტყვით გამოვიდა.

კონფერენციას 100-ზე მეტი სახელმწიფოდან ლიდერები, გარემოს დაცვის მინისტრები და სხვა მაღალი თანამდებობის პირები ესწრებოდნენ.

კონფერენციაზე გლობალურ ჭრილში განიხილეს კლიმატის ცვლილებიდან გამომდინარე გამოწვევების, ბიომრავალფეროვნების დაცვის, ნარჩენებით გარემოს დაბინძურების პრევენციის, ზღვებისა და ოკეანეების დაბინძურების შემცირების საკითხები; განსაკუთრებული ყურადღება დაეთმო საზღვაო გარემოზე კლიმატის ცვლილების ზეგავლენას და მასთან გამკლავების ერთიანი მიდგომის მნიშვნელობას.

დავით სონღულაშვილმა კონფერენციაზე სიტყვით გამოსვლის დროს საქართველოს მდგრადი განვითარების დღის წესრიგზე ისაუბრა და ყურადღება იმ ნაბიჯებზე გაამახვილა, რომლებიც ქვეყანამ შავი ზღვის და მისი ეკოსისტემის დასაცავად გადადგა.

„გარემოს დაცვა გამოცხადებულია საქართველოს მთავრობის ერთ-ერთ უმთავრეს პრიორიტეტად. ჩვენ ვახორციელებთ გარემოსდაცვით პოლიტიკას და ვაგრძელებთ კანონმდებლობის ჰარმონიზაციას ევროკავშირის საუკეთესო პრაქტიკასთან, რაც ევროკავშირთან ასოცირების ხელშეკრულებიდან და ასოცირების დღის წესრიგიდან გამომდინარეობს.

შავი ზღვა არ არის მხოლოდ ეკონომიკური რესურსი - ის საქართველოს საზღვაო კარიბჭეა გლობალურ სივრცეში. ჩვენ ვაგრძელებთ რეგიონულ თანამშრომლობასა და საერთაშორისო პარტნიორებთან კოორდინაციას სამეცნიერო კვლევების, ნარჩენების მდგრადი მართვის, პლასტიკით გარემოს დაბინძურების პრევენციისა და ბიომრავალფეროვნების დაცვის მიმართულებებით.

საქართველო აქტიურად იღებს ზომებს თავისი მდიდარი საზღვაო ეკოსისტემის დასაცავად; 155 კვადრატული კილომეტრი საზღვაო ტერიტორია გამოცხადებულია დაცულ ტერიტორიად. საქართველოს გამორჩეული ბიომრავალფეროვნება დაცულია დაცული ტერიტორიებისა და ზურმუხტის ქსელის საშუალებით, რაც მოიცავს ქვეყნის ტერიტორიის 23%-ზე მეტს. საქართველოს მთავრობა აქტიურად მუშაობს 2030 წლისთვის ამ მაჩვენებლის 30%-მდე გაზრდაზე, რითაც შეასრულებს საერთაშორისო ვალდებულებებს. აქვე მინდა აღვნიშნო, რომ კოლხეთის ეროვნული პარკი, რომელიც მოიცავს ქვეყნის პირველ საზღვაო დაცულ ტერიტორიას, შეტანილია იუნესკოს მსოფლიო მემკვიდრეობის სიაში“, - განაცხადა გარემოს დაცვისა და სოფლის მეურნეობის მინისტრმა.

კონფერენციის ფარგლებში, დავით სონღულაშვილმა არაერთი ქვეყნის გარემოს დაცვის სფეროს ხელმძღვანელს და პარტნიორი საერთაშორისო ორგანიზაციების წარმომადგენლებს შეხვდა. შეხვედრებზე ხაზი გაესვა ერთობლივი ინიციატივების მნიშვნელობას და მომავალი თანამშრომლობის პერსპექტივებს.

აღსანიშნავია, რომ გაეროს 193 ქვეყანამ მდგრადი განვითარებისთვის 17 მიზანი დაისახა. მე-14 მიზანი ოკეანისა და ზღვის რესურსების დაცვას ეხება.

გაეროს მდგრადი განვითარების მე-14 მიზნის განხორციელებასთან დაკავშირებულ კონფერენციაზე „მდგრადი განვითარების მიზნებისთვის, ოკეანეების, ზღვების და საზღვაო რესურსების დაცვა და მდგრადი გამოყენება“ მინისტრ დავით სონღულაშვილთან ერთად მინისტრის პირველი მოადგილე ნინო თანდილაშვილი მონაწილეობდა.