გიორგი გაბუნია: ჩვენი მიზანია, რადიკალური ძალა დასრულდეს ქართულ პოლიტიკაში

„ჩვენი მიზანია, ეს იყო ჩვენი ერთ-ერთი მთავარი წინასაარჩევნო პოლიტიკური დაპირებაც, რომ რადიკალური ძალა, ქართულ პოლიტიკაში დასრულდეს,“ - ამის შესახებ პარლამენტის კულტურის კომიტეტის თავმჯდომარემ გიორგი გაბუნიამ განაცხადა.

როგორც გაბუნია აღნიშნავს, მნიშვნელოვანია პოლიტიკურ სივრცეში ჯანსაღი პოლიტიკური ჯგუფები არსებობდეს.

„გადაწყვეტილების მიღება მათი ნებაა. სამართლებრივ პროცესს ხელს ვერაფერი შეუშლის. საკონსტიტუციო სასამართლო წარმართავს პროცესს ისე, როგორც ეს არის დადგენილი ქართული კანონმდებლობით.

საპარლამენტო საქმიანობაში არც ადგილობრივი ხელისუფლების დონეზე, არცერთ ლეგალურ პოლიტიკურ პროცესში ჩართულები არ იყვნენ. ბოლო წლების განმავლობაში, პრაქტიკულად არ უწარმოებიათ წინასაარჩევნო კამპანია, არ აქვთ არანაირი კავშირი საზოგადოებასთან.

პოლიტიკური პროცესების რადიკალიზაცია, რევოლუცია, სამოქალაქო არეულობა, შეტევა პარლამენტზე, შეტევა პრეზიდენტის სასახლეზე, სისხლი, ცეცხლი - აი ეს არის ერთადერთი მიზანი მათი, რომელიც იყო დღის წესრიგში.

ჩვენი მიზანია, ეს იყო ჩვენი ერთ-ერთი მთავარი წინასაარჩევნო პოლიტიკური დაპირებაც, რომ რადიკალური ძალა, „ნაციონალური მოძრაობა“ და მათი დანაყოფები, რომლებიც ძალიან კოორდინირებულად და სინქრონულად მოქმედებდნენ გარე დავალების შესრულების პროცესში, უნდა დასრულდეს ქართულ პოლიტიკაში. კიდევ ერთხელ ვამბობ, გვჭირდება ოპონირება და ამისთვის მნიშვნელოვანია ჯანსაღი პოლიტიკური ძალები“, - განაცხადა გიორგი გაბუნიამ.