გიორგი ვოლსკი ოპოზიციაზე: დაპირისპირება სახეზეა, ჩვენ ვხედავთ არათუ დაშლას, არამედ შეტაკებას

„ნიკა გვარამია გამოცდილი პროპაგანდისტია, თუმცა ვერ ვიტყოდი, რომ პოზიტიური, პირიქით, საკმაოდ დიდი გამოცდილებით როგორც სახელმწიფო სტრუქტურებში მუშაობის, ასევე იმ პროპაგანდისტული სივრცის შექმნაში, რომელიც ამ ისტერიკას თესავდა, როდესაც კონკრეტულ ტელევიზიას ხელმძღვანელობდა“, – ამის შესახებ პარლამენტის პირველმა ვიცე-სპიკერმა გიორგი ვოლსკიმ განაცხადა.

მისი თქმით, ოპოზიციურ ფლანგზე შეტაკება არის, თუმცა დაშლა – არა, რადგან „ნაციონალური მოძრაობის“ ყოფილი თუ ახლანდელი წევრები ერთი იდეის გარშემო არიან გაერთიანებული.

„რასაკვირველია, დაპირისპირება სახეზეა. ჩვენ ვხედავთ არათუ დაშლას, არამედ შეტაკებას. ამას დაშლას ვერანაირად ვერ დავარქმევ, რადგან იდეა აერთიანებთ და ამ იდეის გარშემო გვარამიაც, სააკაშვილიც, წითლიძეც, ხებეიშვილიც და ნებისმიერი სხვა ადამიანიც ერთადაა. ერთმანეთს ხან შეეკამათებიან, ხან მოეფერებიან და ამას არავითარი მნიშვნელობა არ აქვს. „ქართულ ოცნებას“ „ნაცმოძრაობის“ ამ ფრთასთან თუ მეორე ფრთასთან არავითარი კავშირი არ შეიძლება ჰქონდეს. არც შავი ფული აქვს 40 მილიონი, რომ ამ მავნებელთა სასარგებლოდ დაარიგოს“, – განაცხადა ვოლსკიმ.

„ნაციონალური მოძრაობის“ წევრმა, ანა წითლიძემ განაცხადა: „ნიკა გვარამიამ კაპიტალიზება მოახდინა მიშას რესურსზე, თუ ვინმე იყო „ნაციონალური მოძრაობის“ არაფორმალური მმართველი, ეგ იყო, როცა „მთავარის“ დირექტორი იყო, ბევრ რაღაცაზეა პასუხისმგებელი“.