ინიციატივაა, რომ ტაქსებში მოწევა უნდა აიკრძალოს, რადგან თამბაქოს კვამლი უარყოფითად მოქმედებს ადამიანის ჯანმრთელობაზე - ამირან გამყრელიძე

დაავადებათა კონტროლის ცენტრის დირექტორი ამირან გამყრელიძე საქართველოში ავტომობილებსა და ტაქსებში მოწევის აკრძალვის ინიციატივას ეხმაურება. 

"დაიწყო დიდი დისკუსია, რომ თითქოს დაავადებათა კონტროლის ცენტრი შედის წინადადებით, რომ აიკრძალოს ტაქსებში და საკუთარ მანქანებში. გეთანხმებით, რომ დიახ, შევდივართ. როცა კანონი იქნა მიღებული 2017 წელს, მაშინ დაიშვა ეს გამონაკლისი ტაქსებში მოწევის, მიუხედავად იმისა, რომ ჩვენ არ ვეთანხმებოდით ამას. ახლა, დიახ, ინიციატივაა ის, რომ ტაქსებში არ უნდა ეწეოდეს არც მძღოლი, არც იქ მჯდომი იმიტომ, რომ ის ბოლი, რომელიც გროვდება გამონაბოლქვიდან თამბაქოსი, უარყოფითად მოქმედებს ადამიანის და განსაკუთრებით ბავშვების ჯანმრთელობაზე, ამიტომ დიახ, ჩვენ ვართ ინიციატორი იმის, რომ ტაქსებში მოწევა არ უნდა იყოს. როცა ვჯდები ტაქსიში, ზოგიერთი კეთილმოსურნე მძღოლი გეკითხება, შეიძლება მოვწიო თუ არა. არ უნდა მოსწიოს მძღოლმა, როგორც მე არ უნდა მოვწიო. მე არ ვეწევი, მაგრამ მგზავრმა არ უნდა მოსწიოს", - ამბობს გამყრელიძე.

მისივე თქმით, საკუთარ ავტომობილში მოწევის აკრძალვის ინიციატივა მხოლოდ იმ შემთხვევას ეხება, როდესაც მანქანაში ბავშვი ზის.

"ადამიანები შეჰყავთ შეცდომაში, რომ თითქოს ჩვენ ვკრძალავთ მოწევას საკუთარ მანქანებში. ჩვენ საკუთრებაში არ ვერევით, საკუთარ მანქანაში ვისაც უნდა მოწიოს, მაგრამ არ შეიძლება მოსწიონ იგივე საკუთარ ან სხვა მანქანაში თუ იქ ზის არასრულწლოვანი იმიტომ, რომ ამ ქვეყნის მომავალი დამოკიდებულია ბავშვებზე, ჯანმრთელ ბავშვებსა და მოზარდებზე. თუ იქ ზის ბავშვი და მოზარდი, არასრულწლოვანი, იქ არ შეიძლება, დიახ, ამ წინადადებით შევდივართ, მაგრამ თუ თქვენ მარტო მგზავრობთ და ეწევით თქვენს მანქანაში, იქ ამას არავინ არ დაგიშლით", - განაცხადა გამყრელიძემ.