ლაშა ჟვანია: გასული საუკუნის 90-იანი წლების მიწურულს პირველი შემთხვევა იყო, როცა იერუსალიმიდან წმინდა ცეცხლის ჩამოვიდა. ეს ინიციატივა და ლოცვა-კურთხევა პირველად უწმინდესისგან მოდიოდა

პირველად 2002-2003 წლებში ჩამოუსწრო ცეცხლმა საქართველოში სააღდგომო ლიტანიობას, - განაცხადა გადაცემაში „იმედი Live” სრულიად საქართველოს კათოლიკოს-პატრიარქის ფონდის ხელმძღვანელმა ლაშა ჟვანიამ. მისივე თქმით, წმინდა ცეცხლის ტრადიცია IV საუკუნიდან იღებს სათავეს, როცა მაცხოვრის საფლავზე ტაძარი აშენდა.

„იმ პერიოდში, როგორც საეკლესიო გადმოცემა გვასწავლის, აღდგომის წინა დღეს მღვდელმსახურებმა შენიშნეს ნაპერწკლების სახით ცეცხლის გადმოსვლა მაცხოვრის საფლავზე. აქედან იღებს სათავეს.

რაც შეეხება ქართულ წყაროებს, არ მოგვეპოვება რაიმე წყარო, რომელიც საქართველოში იერუსალიმიდან წმინდა ცეცხლის ჩამობრძანების ეხება. შესაბამისად შეგვიძლია ვთქვათ, რომ გასული საუკუნის 90-იანი წლების მიწურულს პირველი შემთხვევა იყო, როცა იერუსალიმიდან წმინდა ცეცხლის ჩამოვიდა. ეს ინიციატივა და ლოცვა-კურთხევა პირველად უწმინდესისგან მოდიოდა.

ჩვენ პირველად 1993 წელს ჩავედით მისი ლოცვა-კურთხევით წმინდა მიწაზე, ეს იყო ივლის-აგვისტოს თვე და მაშინ შევიტყვეთ ამ ტრადიციის შესახებ. შემდეგ 1995 წელს უწმინდესმა კვლავ გაგვაგზავნა სამი მონაზონი და მე აღდგომის დღესასწაულზე დასასწრებად. მივიღეთ ცეცხლი, გადავუკიდეთ ჭურჭელში და სანამ გამოვედით ტაძრიდან ეს ჭურჭელი დაიმსხვრა ჭყლეტის გამო. ვიყიდეთ პატარა მომცრო ჭურჭელი, რომლითაც წამოვიღეთ ცეცხლი თელ-ავივში, მოხდა ისე რომ ცეცხლი ჩაქრა თვითმფრინავში ასვლის დროს, ჩამოვედით საქართველოში დამწუხრებულები.

შემდეგ იმჟამად ცხუმ-აფხაზეთის მიტროპოლიტის დანიელის ინიციატივით მისმა უწმინდესობამ მოგვცა კურთხევა, რომ წავსულიყავით იერუსალიმში აღდგომის დღესასწაულზე. ეს იყო პირველი შემთხვევაა, როცა ჩვენ ჩამოვაბრძანეთ წმინდა ცეცხლი, ეს იყო ბრწყინვალე ორშაბათს. საპატრიარქოში მივუბრძანეთ უწმინდეს და მოხდა ტაძრებში გადანაწილება.

2002-2003 წლებში პირველად სააღდგომო ლიტანიობას ჩამოუსწრო ცეცხლმა საქართველოს“, - განაცხადა ლაშა ჟვანიამ.