ლევან მაჭავარიანი: ევროკავშირი შედგება 27 ქვეყნისგან. ამ ქვეყნების მოსახლეობას, არა მგონია, იგივე პოზიცია ჰქონდეს, რაც ბრიუსელის ბიუროკრატებს - ბრიუსელის ბიუროკრატია არის მთლიანად გლობალური ომის პარტიის დაქვემდებარებაში

ფრაქცია „ქართული ოცნების“ თავმჯდომარის მოადგილემ ლევან მაჭავარიანმა გადაცემაში „დღის ქრონიკა“ ევროკომისრის მარტა კოსის განცხადება შეაფასა. კერძოდ, როგორც ცნობილია, ევროკომისარმა ქართველი ხალხის მისამართით ასეთი განცხადება გააკეთა: „იყავით ძლიერები, იბრძოლეთ ევროპული ღირებულებებისთვის, ჩვენ თქვენი იმედი გვაქვს“.

მაჭავარიანის შეფასებით, არ შეიძლება, ბრიუსელის ბიუროკრატიის პოზიცია ევროკავშირისა და ევროკავშირის წევრი ქვეყნების პოზიციად შეფასდეს.

„ეს აბსოლუტურად სხვადასხვა რამეა და ამერიკის შეერთებული შტატების მაგალითზეც შეგვიძლია, ვთქვათ. როდესაც ჩვენ არაფორმალურ მმართველობაზე ვსაუბრობდით, მით უმეტეს ბატონი ბაიდენის ადმინისტრაციის დროს, ყოველთვის გამოვყოფდით, „გლობალური ომის პარტია“ რასაც დავარქვით პირობითად და რასაც დღეს უწოდებენ „დიფ სთეითს“. ეს სხვა ძალებია და სხვა გავლენებია და ამერიკის შეერთებული შტატები აბსოლუტურად სხვა რაღაცას წარმოადგენს.

იგივე არის ევროკავშირიც - ევროკავშირი შედგება 27 ქვეყნისგან. ამ ქვეყნების მოსახლეობას, არა მგონია, იგივე პოზიცია ჰქონდეს, რაც თავად ბრიუსელის ბიუროკრატებს უშუალოდ შესაბამისად, პრობლემა არის არა ხალხში, რა თქმა უნდა, ჩვენ ეს არაერთხელ აღგვინიშნავს. ისიც აღგვინიშნავს, რომ მიუხედავად იმისა, რომ აბსოლუტურად სუვერენიტეტ გამოცლილი ქვეყნები, მაგალითად, როგორიც არის ბალტიის ქვეყნები რომ აწესებენ რაღაც უაზრო სანქციებს, ჩვენ ყოველთვის ვაცხადებთ, რომ ჩვენი ხალხების ისტორიული მეგობრობიდან გამომდინარე ჩვენ დავრჩებით ცალმხრივი მეგობრობის რეჟიმში.

შესაბამისად, ეს არის აბსოლუტურად სხვადასხვა რაღაც - ბიუროკრატები მიდიან და მოდიან. ვის რამდენი წელი აქვს დარჩენილი კონკრეტულ პოზიციაზე ყოფნის, ესეც საკითხავია. ძალიან ბევრი სკანდალია და ახლა ვაკვირდებით, როგორ აკრიტიკებენ მაგალითად, ქალბატონ კალასს, რომელიც ძალიან მაღალ პოზიციას იკავებს. ასევე, ქალბატონი ურსულა ფონ დერ ლაიენი არის ევროკომისიის თავმჯდომარე. მის გარშემო რამხელა სკანდალია ატეხილი სასამართლო თემასთან დაკავშირებით, რომელიც ფაიზერის ვაქცინებს ეხება, სადაც მან ინფორმაცია არ გაასაჯაროვა და ასე შემდეგ.

შესაბამისად, ბრიუსელის ბიუროკრატია არის აბსოლუტურად სხვა, ევროკავშირის და ევროკავშირის წევრი ქვეყნების მოსახლეობა არის აბსოლუტურად სხვა. ჩვენ ვერანაირად ვერ გავაიგივებთ მათ“, - განაცხადა მაჭავარიანმა.

მან ასევე აღნიშნა, რომ ბრიუსელის ბიუროკრატია არაფორმალური ოლიგარქიული მმართველობის დაქვემდებარებაშია და ამას შეერთებული შტატებიც აცხადებს.

„ბრიუსელის ბიუროკრატია არის მთლიანად გლობალური ომის პარტიის თუ არაფორმალური ოლიგარქიული მმართველობის დაქვემდებარებაში. ეს მხოლოდ ჩვენი სიტყვები არ არის. როდესაც რამდენიმე თვის წინ ბატონი ვენსი იყო ჩასული მიუნხენში, მან ლექციები ჩაუტარა დემოკრატიაზე სწორედ ბრიუსელის ბიუროკრატებს. სწორედ ამერიკის შეერთებული შტატების მოქმედი ადმინისტრაციის ხმამაღალი განცხადებებია იმასთან დაკავშირებით, რომ სუვერენიტეტი ევროკავშირის ქვეყნებს ფაქტობრივად აღარ გააჩნიათ, ვინაიდან ჭარბი გავლენები არის დღეს ბრიუსელის ბიუროკრატების ხელში, რომელსაც თავის მხრივ აკონტროლებენ ეს ძალები, რომლებზეც ჩვენ ხშირად ვსაუბრობთ და ამერიკის შეერთებული შტატები უფრო ხშირად საუბრობენ“, - განაცხადა ლევან მაჭავარიანმა.