ნინო წილოსანი: საქართველო აგრძელებს ევროკავშირის სტანდარტების შესაბამისად რეფორმების ჩატარებას. დარწმუნებული ვარ, იმ მომენტისთვის, როდესაც ევროკავშირის კარი გაიხსნება, საქართველო იქნება ყველა სხვა კანდიდატ ქვეყანაზე უფრო მეტად მზად

 საქართველო აგრძელებს ევროკავშირის სტანდარტების შესაბამისად რეფორმების ჩატარებას, - განუცხადა „ქრონიკას“ საქართველოს პარლამენტის თავმჯდომარის მოადგილე ნინო წილოსანმა.

წილოსანის თქმით, დარწმუნებულია, რომ იმ მომენტისთვის, როდესაც ევროკავშირის კარი გაიხსნება, საქართველო იქნება ყველა სხვა კანდიდატ ქვეყანაზე უფრო მეტად მზად.

„საუბარიც ზედმეტია იმაზე, თუ საქართველოსთან მიმართებით, რამდენად უსამართლოა მოლაპარაკებების პროცესის შეჩერება. საქართველოზე, რომელიც მათივე ანგარიშებში, რეპორტებსა და დოკუმენტებში საუკეთესო შეფასებებს იმსახურებს თუ ფაქტებზე დაყრდნობით საუბრობენ, მაგრამ ამ დრომდე ჩვენ ვხედავთ კრიტიკას მხოლოდ პოლიტიკური შეფასებების დონეზე. თუმცა, როდესაც უსამართლობაზე ვსაუბრობთ, არ შეიძლება დავივიწყოთ, რომ მაგალითად, უკრაინასაც და მოლდოვასაც, რომლებსაც დღეს მოლაპარაკებების პირველი ბლოკი გაუხსნეს იმ ექვსი მნიშვნელოვანი ბლოკიდან, რომელიც მთლიანად უნდა გაიარონ, 2024 წლიდან მიულოცეს მოლაპარაკებების პროცესის გახსნა და მხოლოდ ახლა გაიხსნა პირველი ბლოკი. საქართველო აგრძელებს ევროკავშირის სტანდარტების შესაბამისად რეფორმების ჩატარებას. დარწმუნებული ვარ, რომ იმ მომენტისთვის, როდესაც ევროკავშირის კარი გაიხსნება, საქართველო იქნება ყველა სხვა კანდიდატ ქვეყანაზე უფრო მეტად მზად“, - აღნიშნა მან.

გაფართოების საკითხებში ევროკომისარი მარტა კოსი ირწმუნება, რომ უკრაინამ და მოლდოვამ ვალდებულებები შეასრულა, შესაბამისად, მათთვის მოლაპარაკების პირველი კლასტერი გაიხსნება. ესტონეთის საგარეო საქმეთა მინისტრმა კი ლუქსემბურგში ზეწოლის შესახებ ილაპარაკა და კვლავ სანქციებით იმუქრება. ბრიუსელის ორმაგ სტანდარტსა და შანტაჟის მცდელობაზე საუბრობენ თბილისში. მმართველი გუნდის შეფასებით, საქმე გვაქვს პოლიტიკურ პროცესთან, რადგან კანდიდატ ქვეყნებს შორის ლიდერი საქართველოა.