"ქარდავას გადმოცემით ბევრ გასამართლებულ ყოფილ მაღალჩინოსანს აენთება წითელი და დაეკარგება დაუსჯელობის შეგრძნება" - ამირან სალუქვაძე

თადარიგის გენერალი, ამირან სალუქვაძე მეგის ქარდავას უკრაინიდან გადმოცემის ფაქტს სოციალურ ქსელში გამოეხმაურა.

სალუქვაძე იმ პოლიტიკოსებს, ვინც მეგის ქარდავას საქართველოში ექსტრადირების საკითხს ეწინააღმდეგებოდა, მოუწოდებს, რომ სერგო თეთრაძის ოჯახს და კასრების საქმეების ფიგურანტებს ჩახედოს თვალებში.

"როგორც იხილეთ, მეგის ქარდავას უკრაინიდან გადმოცემა განხორციელდა.

ბევრი გამოთქვამს და გამოთქვამდა უკმაყოფილებას დამნაშავეთა დაუსჯელობასთან დაკავშირებით. სამართლის აღსრულებას, ხშირად, ისინი უშლიან ხელს, ვინც დახმარებას უნდა გვიწევდეს. საბოლოოდ ყველა უნდა წარდგეს და წარდგება მართლმსაჯულების წინაშე.

ყველაზე სამარცხვინო, რაც ამ დღეებში ვიხილეთ, იყო ზოგიერთი პოლიტიკოსის და აქტივისტის ღია პოზიციონირება დამნაშავის მხარეს და აქტიური ქმედებები მისი გადმოცემის პროცესის შეფერხებასთან დაკავშირებით.

სამარცხვინოა ზოგიერთი, საზოგადოებისთვის ცნობილი პირის მხრიდან ექსტრადიციის არჩევნებთან დაკავშირება. ღირსიც არ არიან მათი გვარები დავასახელო. სერგო თეთრაძის ოჯახს და კასრების საქმეების ფიგურანტებს ჩახედონ თვალებში.

რაც შეეხება მეგის ქარდავას გადმოცემის ფაქტს, როგორც გახმოვანდა, პირდაპირ ვუკავშირებ ირაკლი ღარიბაშვილის უკრაინაში ვიზიტს. მანამდე პრეზიდენტ ზელენსკის ვიზიტი შედგა.

ამის შესახებ თავადაც, ვგულისხმობ ყოფილ ხელისუფლებას, იციან. მანამდე ვნახეთ, რომ ბაქო-ერევანს შორის აღმოჩნდა კარგი მომლაპარაკებელი.

ქარდავას გადმოცემით ბევრ გასამართლებულ ყოფილ მაღალჩინოსანს აენთება წითელი და დაეკარგება დაუსჯელობის შეგრძნება.

შესაბამისად, ღარიბაშვილზე პოლიტიკური და საინფორმაციო შეტევა გაცილებით გაძლიერდება", - წერს სალუქვაძე.

საქართველოს თავდაცვის სამინისტროს სამხედრო პოლიციის დეპარტამენტის ყოფილი უფროსის, მეგის ქარდავას უკრაინიდან ექსტრადიცია დღეს განხორციელდა.

საქართველოში სისხლის სამართლის 11 საქმეზე ბრალდებული და მსჯავრდებული მეგის ქარდავა უკრაინაში 2017 წლის პირველ ნოემბერს დააკავეს.

ქარდავას ექსტრადირებას ქართული მხარე მისი დაკავების დღიდან ითხოვდა.

2018 წლიდან მეგის ქარდავას საექსტრადიციო პატიმრობა შინაპატიმრობით ჰქონდა შეცვლილი, რამდენიმე დღის წინ კი ის კვლავ საპატიმროში გადაიყვანეს.