საპატრიარქო: ინფორმაცია, თითქოს ერთაწმინდის ტაძარი, სასულიერო პირებმა განგებ დააზიანეს, ღუმელი დადგეს და მილი სარკმლიდან გაიყვანეს – სიმართლეს არ შეესაბამება

„ინფორმაცია, თითქოს ერთაწმინდის ტაძარი, სასულიერო პირებმა განგებ დააზიანეს, ღუმელი დადგეს და მილი სარკმლიდან გაიყვანეს – სიმართლეს არ შეესაბამება“, – ამის შესახებ განცხადება საქართველოს საპატრიარქოს საზოგადოებასთან ურთიერთობის სამსახური ავრცელებს.

მათივე ცნობით, გავრცელებული ფოტომასალა გადაღებულია ტაძრის რესტავრაციამდე.

"რამდენიმე დღის წინ სოციალურ ქსელში გავრცელდა ფოტო. მასზე ასახული იყო ერთაწმინდის ტაძარი, რომელიც სასულიერო პირებმა თითქოს განგებ დააზიანეს, ღუმელი დადგეს და მილი სარკმლიდან გაიყვანეს.

საზოგადოებას განვუმარტავთ, რომ აღნიშნული ფაქტი სიმართლეს არ შეესაბამება. ფოტომასალა ძველია. ფოტო გადაღებულია ტაძრის რესტავრაციამდე.

აქვე დავძენთ, რომ ერთაწმინდის ტაძარს დაახლოებით ათ წელზე მეტია, სრულფასოვანი რესტავრაცია ჩაუტარდა და მას შემდეგ არავითარი მსგავსი ფაქტი არ დაფიქსირებულა.

სამწუხაროდ, არ არის პირველი შემთხვევა, როდესაც ეკლესიის დისკრედიტაციის მიზნით, საზოგადოებაში მსგავსი ცრუ ბრალდება და ცილისმწამებლური განცხადებები ვრცელდება.

თვალსაჩინოებისთვის გთავაზობთ ფოტომასალას. პირველ ორზე ასახულია სოციალურ ქსელში გავრცელებული ერთაწმინდის ტაძრის ძველი, რესტავრაციამდე მდგომარეობა, დანარჩენზე კი – ტაძრის ამჟამინდელი რეალური იერსახე", – აღნიშნულია საპატრიარქოს მიერ გავრცელებულ ინფორმაციაში.

სხვა სიახლეები:

🔲 მსახიობი ნინო თუთბერიძე გარდაიცვალა

🔲 "ბათუმ-თელავ-ანაკლია-სიღნაღი და სხვა ქალაქები ასე რომ მეამაყება მიშას დამსახურებაა და შემახსენეთ არგუმენტები - თქვენ რატომ უნდა გცემდეთ პატივს?" - გურამ შეროზია "ოცნებას"