შალვა პაპუაშვილი: ბევრ რამეს შეგვახსენებს კონსტიტუცია, მისი მიღების ისტორიაც. ამ გაკვეთილებზე დაყრდნობით მოქმედებს ხელისუფლება, არ დავუშვათ გარედან ქვეყნის შიგნით დაპირისპირება, არ დავუშვათ ეკლესიის მიმართ არასათანადო დამოკიდებულებები

დღეს მაგიდაზე რამდენიმე გამოცემა დაგხვდათ. გარეთ პარლამენტის სხდომათა დარბაზის შესასვლელთან გამოფენილია 1995 წლის 24 აგვისტოს მიღებული საქართველოს კონსტიტუციის ორიგინალი, რომელზედაც არის მაშინდელი პარლამენტის ყველა წევრისა და საკონსტიტუციო კომისიის წევრების ხელმოწერა, - განაცხადა პარლამენტის თავმჯდომარე, შალვა პაპუაშვილმა საქართველოს პლენარულ სხდომაზე.

როგორც შალვა პაპუაშვილმა აღნიშნა, კონსტიტუციის ორიგინალი სახელმწიფო არქივში ინახება. თუმცა, დღეს სტუმრებს დაურიგდებათ ორიგინალის ზუსტი ასლი.
მისი თქმით, ბევრ რამეს შეგვახსენებს ჩვენი კონსტიტუცია არა მხოლოდ მისი შინაარსი, არამედ მისი მიღების ისტორიაც.

,,საქართველოს კონსტიტუცია ბევრ რამეს შეგვახსენებს - უპირველეს ყოვლისა შეგვახსენებს თავის შინაარსს. დღეს განსაკუთრებით ხაზგასასმელია კონსტიტუცია, რომელშიც აღინიშნა საქართველოს მართლმადიდებელი ეკლესიის განსაკუთრებული როლი საქართველოს ისტორიაში. ამ განსაკუთრებული როლის აღნიშვნას მოჰყვა 2002 წელს სახელმწიფოსა და ეკლესიას შორის კონკორდატის ხელმოწერა. კონკორდატის ასლიც გამოვეცით და დაგირიგდათ.

1995 წლის 24 აგვისტოს საქართველოს კონსტიტუცია მიიღეს, 25 აგვისტოს დაგეგმილი იყო კონსტიტუციის ხელმოწერა, თუმცა სახელმწიფოს მეთაურზე ტერაქტი მოხდა - მაშინაც გარე ძალების ჩარევით, შიგნით ხელების ფათურითა და გარედან ადამიანების ქვეყნის შიგნით დაპირისპირების წაქეზებით ტერაქტი მოხდა და კონსტიტუციის ხელმოწერა გადაიდო.

შემდეგ 1995 წლის 17 ოქტომბერს პარლამენტის ამ დარბაზში ხელმოწერის ცერემონია გაიმართა. გარეთ, კონსტიტუციის ორიგინალთან ერთად, ასევე იხილავთ იმ ღონისძიების კადრებს, როცა კონსტიტუციის ხელმოწერა მოხდა.

ბევრ რამეს შეგვახსენებს ჩვენი კონსტიტუცია - არა მხოლოდ მისი შინაარსი, არამედ მისი მიღების ისტორია. სწორედ ამ გაკვეთილებზე დაყრდნობით მოქმედებს დღეს ჩვენი ხელისუფლება, რომ არ დავუშვათ გარედან ქვეყნის შიგნით დაპირისპირება, არ დავუშვათ ეკლესიის მიმართ არასათანადო დამოკიდებულებები. ყველაფერი ეს საბოლოო ჯამში, ჩვენს სახელმწიფოებრიობას აძლიერებს“, - განაცხადა შალვა პაპუაშვილმა.