შალვა პაპუაშვილი: მაშინ, როდესაც ევროკავშირის საელჩოს აქვს მიმოწერა ტერორისტთან, რა თქმა უნდა ჩვენი ნდობა ევროკავშირის საელჩოს და ევროკავშირის საელჩოს მხრიდან მომდინარე დაფინანსების მიმართ არის ძალიან დაბალი

მაშინ, როდესაც ევროკავშირის საელჩოს აქვს მიმოწერა ტერორისტთან, რა თქმა უნდა ჩვენი ნდობა ევროკავშირის საელჩოს და ევროკავშირის საელჩოს მხრიდან მომდინარე დაფინანსების მიმართ არის ძალიან დაბალი, - განაცხადა საქართველოს პარლამენტის თავმჯდომარემ შალვა პაპუაშვილმა არასამთავრობო ორგანიზაციების დაფინანსებასთან დაკავშირებით საუბრისას.

მისივე თქმით, ამგვარ დაფინანსებას ყველა ეჭვის თავლით უყურებს.

„ჩვენ ვნახეთ, რომ ევროკავშირის საელჩო აფინანსებდა ორგანიზაციებს, რომელზეც უკვე მხილებულია, რომ ისინი ყიდულობდნენ აღჭურვილობას მოძალადეებისთვის პოლიციისთვის წინააღმდეგობის გასაწევად. ISFED-ის მოქმედმა ხელმძღვანელმა აღიარა, რომ წინა ხელმძღვანელის პირობებში მათ იყიდეს პოლიციისთვის წინააღმდეგობის გასაწევი აღჭურვილობა და მისცეს აქციის მონაწილეებს. იგულისხმება, რომ ეს არის დონორების ფული და დიდი ალბათობით იყო ევროკავშირის ფული.

დადასტურებულია, რომ ევროკავშირის ფული მიდიოდა მოძალადეებისთვის აღჭურვილობის დასარიგებლად იმისთვის, რომ მათ პოლიციისთვის გაეწიათ წინააღმდეგობა. ამაზე ევროკავშირის საელჩოს დღემდე არანაირი განმარტება არ გაუკეთებია. ჩვენ ვნახეთ, რომ თურმე ევროკავშირის საელჩოს აქვს მიმოწერა ტერორისტთან.

ზვიად ცეცხლაძესთან დაკავშირებით უკვე არსებობს განაჩენი, რომლითაც დადასტურებულია, რომ ის იყო ძალადობის ორგანიზატორი და ამას საერთაშორისო ტერმინოლოგიაში ჰქვია ტერორიზმი.

სამწუხაროა, რომ ამ ყველაფრის გამო ეჭვის თვალით ვუყურებთ ევროკავშირის მხრიდან დაფინანსებას. ასე ნაბიჯ-ნაბიჯ ცხადდება, რომ წამების მსხვერპლთა საფარქვეშ ერთიანდებიან და ამ თანხებს ხარჯავენ იმისთვის, რომ დაამხონ ხელისუფლება, წინააღმდეგობა გაუწიონ პოლიციას და წაახალისონ მოძალადეები“, - აღნიშნა შალვა პაპუაშვილმა.