შალვა პაპუაშვილი: თურქეთი საქართველოს სტრატეგიული მოკავშირე და სანდო მეზობელია, ვაფასებთ მის ჩართულობას შავი ზღვისა და სამხრეთ კავკასიის რეგიონში მშვიდობის უზრუნველყოფაში

თურქეთი საქართველოს სტრატეგიული მოკავშირე, უმსხვილესი სავაჭრო პარტნიორი და სანდო მეზობელია. ჩვენ დიდად ვაფასებთ თურქეთის ურყევ მხარდაჭერას საქართველოს სუვერენიტეტისა და ტერიტორიული მთლიანობისადმი, ასევე მის ჩართულობას შავი ზღვისა და სამხრეთ კავკასიის რეგიონში მშვიდობისა და სტაბილურობის უზრუნველყოფის საქმეში, - ამის შესახებ საქართველოს პარლამენტის თავმჯდომარემ შალვა პაპუაშვილმა თურქეთის დამოუკიდებლობის დღის აღსანიშნავ ღონისძიებაზე სიტყვით გამოსვლისას განაცხადა.

პაპუაშვილის თქმით, სულ უფრო კომპლექსურ და არასტაბილურ გეოპოლიტიკურ გარემოში, საქართველოსა და თურქეთს შორის თანამშრომლობის გაძლიერება აუცილებელია ქვეყნების მომავალი პროგრესისთვის.

„ჩემთვის დიდი პატივი და სიამოვნებაა, რომ დღეს თქვენთან ერთად აღვნიშნავ თურქეთის რესპუბლიკის გამოცხადების 102-ე წლისთავს. დღევანდელი დღე განსაკუთრებული შესაძლებლობაა, რათა პატივი მივაგოთ მუსტაფა ქემალ ათათურქისა და ყველა იმ ადამიანის ხედვას, რომლებმაც თქვენს დიდებულ სახელმწიფოს საფუძველი ჩაუყარა. მათმა შორსმჭვრეტელობამ და პროგრესის მიღწევის მისწრაფებამ, ასევე, მათ მიერ დამკვიდრებულმა პრინციპებმა - სუვერენიტეტი, თანამედროვე მმართველობა და წინსვლის სულისკვეთება - ქვეყნის ტრანსფორმაცია მოახდინა და დღესაც ინარჩუნებს აქტუალობას.

თურქეთი საქართველოს სტრატეგიული მოკავშირე, უმსხვილესი სავაჭრო პარტნიორი და სანდო მეზობელია. ჩვენ დიდად ვაფასებთ თურქეთის ურყევ მხარდაჭერას საქართველოს სუვერენიტეტისა და ტერიტორიული მთლიანობისადმი, ასევე მის ჩართულობას შავი ზღვისა და სამხრეთ კავკასიის რეგიონში მშვიდობისა და სტაბილურობის უზრუნველყოფის საქმეში.

სულ უფრო კომპლექსურ და არასტაბილურ გეოპოლიტიკურ გარემოში, საქართველოსა და თურქეთს შორის თანამშრომლობის გაძლიერება აუცილებელია ჩვენი ქვეყნების მომავალი პროგრესისთვის. ერთმანეთის დამოუკიდებლობის პატივისცემა, რაც, დემოკრატიული არჩევნების გზით, ჩვენი ხალხების ნებაში გამოიხატება, ყოველთვის იყო თურქეთთან ჩვენი სტრატეგიული ურთიერთობების ქვაკუთხედი. სუვერენიტეტი და სახალხო დემოკრატიის პატივისცემა დამოუკიდებელ ქვეყნებს შორის ურთიერთობებში ყველაზე მნიშვნელოვანი პრინციპი უნდა იყოს, რადგან სუვერენიტეტი ხალხის ნების ძირითადი გამოხატულებაა, რაც თანამედროვე მსოფლიოში დემოკრატიული ლეგიტიმაციის მთავარი წყაროა.

საქართველო და თურქეთი რესპუბლიკებია და თავად ტერმინი „რესპუბლიკა“ ასახავს მის მთავარ პრინციპს – ხალხის საერთო საქმეს, საერთო ამოცანას და არავის აქვს უფლება, გარედან ჩაერიოს რესპუბლიკის გადაწყვეტილებებში. სახალხო სუვერენიტეტის დამხობის ნებისმიერი მცდელობა ეწინააღმდეგება დემოკრატიის სულისკვეთებას“, - აღნიშნა პაპუაშვილმა.

ამასთან, მისივე თქმით, თურქეთისა და საქართველოს პარლამენტები ჩვენი დამოუკიდებლობისა და დემოკრატიის ქვაკუთხედია.

„ჩვენ განსაკუთრებულ მნიშვნელობას ვანიჭებთ ჩვენს კოლეგებთან თურქეთის დიდი ეროვნული ასამბლეიდან საპარლამენტო კავშირების გაღრმავებას. წელს, ივნისში, საპარლამენტო დელეგაციასთან ერთად, ოფიციალური ვიზიტით თურქეთს ვესტუმრე. ჩემს კოლეგასთან, პარლამენტის თავმჯდომარე ნუმან ქურთულმუშთან მეგობრული და ნაყოფიერი შეხვედრა მქონდა. ჩვენი შეხვედრები ყოველთვის კონსტრუქციული, გულწრფელი და მომავალზე ორიენტირებულია. იმედი მაქვს, რომ ჩემი კოლეგა მალე ეწვევა საქართველოს“, - აღნიშნა პაპუაშვილმა.

მისივე თქმით, საქართველო და თურქეთი ერთად ქმნიან შესაძლებლობების ისტორიულ დერეფანს, რომელიც ევროპასა და აზიას აკავშირებს და სარგებელს მოუტანს ჩვენს ხალხებს.

„მოხარული ვარ, რომ დღეს ჩვენ განახლებული ოპტიმიზმით ვუყურებთ ჩვენს რეგიონს, რადგან ვხედავთ სამხრეთ კავკასიაში გრძელვადიანი მშვიდობისა და უსაფრთხოების დამყარების გზაზე პროგრესის ნიშნებს, მათ შორის, სომხეთსა და აზერბაიჯანს შორის სამშვიდობო ხელშეკრულების პერსპექტივებს და ამ ორ ქვეყანას შორის სატრანზიტო შეზღუდვების მოხსნას. ჩვენ, ასევე, მივესალმებით თურქეთსა და სომხეთს შორის ნორმალიზების პროცესში გადადგმულ პოზიტიურ ნაბიჯებს. საქართველო მტკიცედ უჭერს მხარს ამ პროცესს. გვჯერა, რომ სტაბილური, მშვიდობიანი სამხრეთ კავკასია ახალ შესაძლებლობებს შექმნის მეტი დაკავშირებადობის, ეკონომიკური ზრდის, ვაჭრობისა და ხალხთაშორისი გაცვლებისთვის“, - განაცხადა შალვა პაპუაშვილმა.

შალვა პაპუაშვილმა საქართველოს პარლამენტის სახელით კიდევ ერთხელ მიულოცა თურქ ხალხს თურქეთის რესპუბლიკის გამოცხადების წლისთავი.

„თურქ ხალხს ვუსურვებ მშვიდობას, კეთილდღეობასა და მზარდ წარმატებას. კიდევ ერთხელ ვადასტურებ ჩვენს მეგობარ ქვეყნებს შორის მეგობრობის, თანამშრომლობის, ურთიერთპატივისცემისა და აქტიური სტრატეგიული პარტნიორობის მიმართ ჩვენს ერთგულებას“, - განაცხადა შალვა პაპუაშვილმა.