თურქეთიდან იმპორტირებული დაბალფასიანი მედიკამენტები აფთიაქებში სავარაუდოდ, მარტის ბოლოდან გამოჩნდება

"ხელისუფლების ინიციატივის ფარგლებში, თურქეთიდან იმპოტირებული, შედარებით დაბალფასიანი მედიკამენტები საქართველოში მოქმედ სარეალიზაციო ქსელებში, სავარაუდოდ მარტის ბოლოდან გამოჩნდება. ეს იქნება პირველი პარტიები და არა მასობრივად შემოტანილი წამლები, და პირველი ანალიზის შესაძლებლობაც ამ პერიოდიდან გახდება შესაძლებელი", - ამის შესახებ ფარმაცევტული კომპანიების ასოციაციის აღმასრულებელი დირექტორი  ილონა კოკიაშვილი აცხადებს.

მისი თქმით, ამ ეტაპზე იმპორტიორები მოლაპარაკებებს აწარმოებენ თურქ პარტნიორებთან, რომლებთანაც შესათანხმებელია უამრავი ნიუანსი.

მისივე განცხადებით, კომპანიები თავად გადაწყვეტენ რა სახეობის, რა რაოდენობის წამლები შეისყიდონ თურქეთიდან და რომელი ბაზარი ჩაანაცვლონ ამ შესაძლებლობით.

„რა ეფექტს მოიტანს ეს ჩვენი ბაზრისთვის, ამის გაგებას, როგორც იანვარში ვთქვი, ჯამში სჭირდება 3-4-თვიანი პერიოდი, სავარაუდო დინამიკა გამოჩნდება ამ პერიოდის გასვლის შემდეგ და გავიგებთ თუ რამდენი მედიკამენტი ჩანაცვლდება, რა სახეობის.

ეს არის კომერციული და ტექნიკური საკითხი იმიტომ რომ ყველა იმპორტიორი თავად გადაწყვეტს რომელ ბაზარს ჩაანაცვლებს თურქეთის ბაზრით.

რა ფასდაკლებებში იქნება, ეს თემაც დროის შემდეგ განხილვის საგანია.

ფასდაკლება შეიძლება 5% იყოს, შეიძლება 10-15%.

თურქეთში სხვა სახის რეგულაციაა ფასზე, იქ სუბსიდირდება სახელმწიფოს მიერ, ამიტომ აქ რომელი შემოვა და როგორი ფასით ამის წინასწარ პროგნოზირება შეუძლებელია.

ამის ანალიზს შევძლებთ სავარაუდოდ მარტის ბოლოდან, როცა ფიზიკურად რეალიზაციაში ჩაეშვება მედიკამენტების ნაწილი,”- განაცხადა ილონა კოკიაშვილმა.

შეგახსენებთ: 17 იანვრიდან საქართველოსთვის თურქეთის ფარმაცევტული ბაზარი გაიხსნა.

ცვლილების შედეგად ის ფარმაცევტული საშუალებები, რომლებიც თურქეთის ბაზარზეა აკრედიტებული, მათ შორის როგორც თურქული, ისე არათურქული წარმოების, საქართველოს ბაზარზეც ავტომატურად იქნება აღიარებული.

წყარო: jandacva

სხვა სიახლეები:

📍"დამითმია ბურთი და მოედანი "ბლოგერებისთვის" - რატომ აუქმებს ფეისბუკ გვერდს ექიმი ზაზა თელია

📍გიორგი ფხაკაძე: ჩვენი “ვარსკვლავი” ექიმები, რომლებმაც "ომიკრონი" ჩვეულებრივ გრიპად გამოაცხადეს, ხომ არ გავგზავნოთ ბრიტანეთში დასახმარებლად?!