„ყოველთვის 19 წლის გიო დარჩები … უყვარხარ დაიკოს“ – დღეს გიორგი შაქარაშვილი 21 წლის გახდებოდა

დღეს, განსაკუთრებული სისასტიკით მოკლული 19 წლის ფეხბურთელის გიორგი შაქარაშვილის დაბადების დღეა. ის 21 წლის გახდებოდა.

გიორგი შაქარაშვილის და, ანი შაქარაშვილი სოციალურ ქსელში წერს:

„რამდენი წელიც არ უნდა გავიდეს ჩემს მეხსიერებაში ყოველთვის 19 წლის გიო დარჩები … გილოცავ შენს 21-ე დაბადების დღეს იმიერ საქართველოში, მთელი გულით უყვარხარ დაიკოს.“

ცნობისთვის: 18 ივნისს, გვიან ღამით, მცხეთის რაიონში, ნარეკვავის დასახლებაში არსებულ ერთ-ერთ აგარაკზე, სადაც დაბადების დღის წვეულება აღინიშნებოდა, ახალგაზრდებს შორის დაპირისპირება დაიწყო.

გიორგიმ და მასთან ერთად, კიდევ ხუთმა ახალგაზრდამ, გურამ ამირხანაშვილმა, ვახტანგ ახვლედიანმა, გიორგი ქათამაძემ, იაკობ ბრეგვაძემ და კონსტანტინე ღიბრაძემ თბილისში წასვლა გადაწყვიტეს.

და იმ იმედით, რომ ტაქსის გააჩერებდნენ, მცხეთის მაგისტრალს ფეხით დაადგნენ. აგარაკზე, ფიზიკურ დაპირისპირებაში ჩართულმა რამდენიმე ახალგაზრდამ, დასახმარებლად თბილისიდან, კერძოდ, ნაძალადევის რაიონიდან, მოიხმო რამდენიმე კაციანი ჯგუფი, რომლებიც თბილისიდან მცხეთის მიმართულებით, ორი მანქანით, „მერსედესითა“ და „ტოიოტა ქამრით“ გაეშურნენ.

პროკურატურის ინფორმაციით, სწორედ ეს პირები წამოეწივნენ თბილისი-ლესელიძე-სენაკის ტრასაზე, თბილისისკენ ფეხით მომავალ გიორგი შაქარაშვილსა და მის თანმხლებ პირებს.

გიორგისთან ერთად მყოფ ახალგაზრდების ნაწილს ისინი ფიზიკურად გაუსწორდნენ, ნაწილმა გაქცევა მოასწრო. გიორგის კვალი ამ თავდასხმისას გაუჩინარდა.

გიორგი შაქარაშვილის გაუჩინარების შესახებ, ოჯახმა პოლიციას 19 ივნისს მიმართა. ოთხდღიანი საძიებო სამუშაოების შემდეგ, 22 ივნისს, ის მდინარე არაგვში, გარდაცვლილი იპოვეს.

19 წლის ფეხბურთელის, გიორგი შაქარაშვილის გარდაცვალების საქმეზე, 17 პირი დააკავეს. მათ შორის, ექვსი არასრულწლოვანი. 

ასევე საინტერესოა:

🔵 შაქარაშვილის დედის ემოციური წერილი შვილს: არავითარი იუბილე, მე და შენ მივდივართ სასამართლოში

🔵 „თქვენო ღირსებავ… დღემდე თვალებიდან არ ამომდის ატირებული მოსამართლე“ – ნათია მეზვრიშვილი გარდაცვლილ მოსამართლეს ემშვიდობება

🔵 „ვილოცოთ, თამაზ მეჭიაური კომაშია და არ ვიცით რა იქნება” – რა ინფორმაციას აქვეყნებს მაკა რაზმაძე